BOBONARU, 11 Dezembru 2025 (TATOLI) – Prezidente Autoridade Munisípiu Bobonaru, Paulo Moniz Maia, husu ba Sekretariadu Tékniku Administrasaun Eleitorál (STAE) atu optimiza liután edukasaun eleitorál no atualiza dadus eleitór sira hodi garante prosesu demokrátiku ne’ebé livre, justu, no imparsiál iha tinan 2026.
Durante sesaun reflesaun hamutuk ho diretór-jerál, nasionál, munisipál no funsionáriu STAE iha munisípiu12 no Rejiaun Administrativa Espesiál Oekusi-Ambeno (RAEOA) no Ataúru, Paulo Moniz Maia hato’o nia apresiasaun ba kolaborasaun ne’ebé estabelese ona iha fornesimentu dadus populasaun nian, ne’ebé forma baze ba dezenvolvimentu planu oioin iha dezenvolvimentu munisipál nian.
Nia subliña katak dokumentu sira hanesan Planu Asaun Anuál, Planu Dezenvolvimentu Munisipál no Planu Dezenvolvimentu Komunitáriu depende maka’as ba dadus ne’ebé loos atu asegura alokasaun rekursu sira ne’ebé efetivu ba komunidade.
Autoridade Bobonaru ne’e mós subliña importánsia atu atualiza dadus eleitór sira-nian antes eleisaun sira iha tinan ida ka rua oinmai, inklui eleisaun Kámara Munisipál iha 2026.
Nia esplika katak partisipasaun eleitorál sei fó impaktu diretamente ba númeru kadeira sira iha eleisaun Kámara Munisipál nian.
Notísia relevante: STAE Bobonaru halo REABD Biométriku ba EhD no idozu 6.110
“Dadus ne’e importante atu determina númeru asentu ne’ebé sei hola fatin iha asembleia munisipál nian. Se númeru eleitór ne’e menus, ita mós sei hetan númeru asentu ne’ebé uitoan (13-15 de’it). Nune’e, presiza mós realiza rejistu móvel hodi fornese oportunidade ba eleitór sira ne’ebé tinan to’o ona no sira ne’ebé tuir lei tenke halo fali resenseamentu, karik iha mudansa ruma ba sira- nia hela fatin”, nia hateten iha salaun Maria Tapó, kinta ne’e.
Antigu deputadu ne’e mós destaka nesesidade ba edukasaun votante ne’ebé intensiva liután, partikularmente ba estudante sekundáriu sira ne’ebé sei sai votante ba dahuluk.
Kona-ba koordenasaun, nia subliña katak autoridade Bobonaru nia prontidaun atu fó apoiu lojístiku bainhira presiza ba atualiza dadus eleitorál, liuliu konsidera dezafiu jeográfiku rejiaun nian. “Koordenasaun la’o di’ak to’o agora, maibé karik iha futuru presiza apoiu adisionál, ami prontu ajuda, nune’e serbisu sira la’o ho ótimu”, Paulo garante.
Nia espera katak pasu sira ne’e bele hasa’e partisipasaun públiku no hametin kualidade demokrasia iha Bobonaru.
Biban ne’e, Diretór-Jerál STAE, Elviro Moniz, konsidera rekomendasaun hirak ne’e pertinente, maibé STAE nafatin presiza kooperasaun no kolaborasaun mútua ho autoridade Bobonaru hodi hasoru eleisaun sira tuirmai.
Elviro adianta STAE sei implementa atividade boot rua iha tinan oin hanesan resenseamente eleitorál iha nivel postu no identifikasaun fatin ba votasaun. “Ami presiza fatin, seguransa, ami presiza apoia koordenasaun nivel munisípiu, postu no suku, liuliu iha área implementasaun atividade resenseamentu eleitorál no atualizasaun baze dadus biométriku iha nivel postu, nomós preparativu eleisaun nian, liuliu levantamentu ka identifikasaun sentru votasaun hamutuk ho STAE, ita bele mobiliza rekursu bá terrenu”, katak.
Tuir dadus ne’ebé Tatoli asesu, iha Jullu to’o Agostu 2025, STAE Bobonaru liuhusi atividade rejistu movel iha postu administrativu neen halo Resensiamentu Eleitorál no Atualizasaun Baze Dadus (REABD) ho baze biométriku ba idozu no ema ho defisiénsia hamutuk 6.110.
Notisía relevante: STAE Bobonaro lansa REABD iha aldeia Bour prepara ba eleisaun suku
Jornalista: Sergio da Cruz
Editora: Maria Auxiliadora
