BALIBO, 04 setembru 2023 (TATOLI)-Sekretariadu Tékniku Administrasaun Eleitorál (STAE), Munisípiu Bobonaro, segunda ne’e halo lansamentu Programa Resensiamentu Eleitorál Atualizasaun Baze de Dadus (REABD) ba komunidade iha aldeia Bour, suku Leo-lima, postu administrativu Balibó, hodi prepara ba eleisaun suku ne’ebé sei realiza iha loron 28 fulan-outubru 2023.
Reprezentante Diretór STAE Munisípiu Bobonaro, José Guterres, hateten lansamentu ne’e simbolikamente reprezenta munisípiu Bobonaro tomak hodi hakbesik programa atendimentu governu ba komunidade sira.
Notísia Relevante:STAE Bobonaro hahú rekruta PSAS-PSAA
“Ami haree ba situasaun, kondisaun dalan ne’ebé maka distánsia dook hosi munisipiu no mós postu administrativu, tanba ne’e mak sira bolu ami mai iha aldeia Bour halo atividade ne’e,” nia informa ba jornalista sira, iha sede aldeia Bour.
José esplika, iha programa ne’e tékniku operadór sistema sira sei halo atendimentu ba komunidade sira-ne’ebé atinje idade 16, kartaun eleitorál tohar, lakon no muda hela-fatin.
“Ninia rekizitu mak tenke lori Billete Identidade (BI) válidu, Sertidaun Nasimentu RDTL no pasaporte Timor-Leste válidu. Sé buat tolu ne’e laiha STAE la atende, ami sei indika fali ba rejistu sivíl hodi trata fali ninia dokumentu komprovativu,” nia fó hanoin.
Xefe suku Leolima, Marcelino Magno, agradese ba STAE tanba bele halo atendimentu to’o aldeia.
“Ita nia inan-aman sira atu ba iha munisípiu maibé dook liu, depois fasilidade mós menus, programa governu ida-ne’e di’ak tebes, ami husu halo ba beibeik,” nia guau.
Enkuantu tuir dadus, eleitór munisípiu Bobonaro ne’ebé elijível partisipa iha eleisaun parlamentár 21 maiu 2023 ne’e na’in-72,537.
Notísia relevante: STAE Bobonaro ho líder lokál sira diskute preparasaun eleisaun suku
Jornalista: Sérgio da Cruz
Editór: Evaristo Soares Martins
