MALIANA, 31 jullu 2023 (TATOLI)-Sekretariadu Tekniku Administrasaun Eleitorál (STAE) munisípiu Bobonaro, hahú loke vaga konaba Pesoál STAE Apia Suku (PSAS) no Pesoál STAE Apoia Aldeia (PSAA) hodi prepara fó apoia ba eleisaun suku ne’ebé sei realiza iha tempu badak.
Lei númeru 9/2016, 08 jullu fó kompetensia ba STAE atu fó apoia ba realiza eleisaun suku, lei Suku ne’e ho natureza jurídika asosiasaun públika no objetivu fundamentál hosi lei estabelese norma organizasaun, kompeténsia no funsionamentu suku iha territóriu nasionál. Lei suku ne’e previstu artigu hamutuk 97 no modu eleisaun xefe suku eleitu ho sufrájiu universál, livre, diretu, sekretu no pesoál.
Diretór STAE munisípiu Bobonaro,Mariano Viregas Amarál, esplika, rekrutamentu refere bazea ba orientasaun hosi Diresaun Jerál (STAE) no Ministériu Administrasaun Estatál (MAE).
Nia esplika, PSAS ne’ebé STAE presiza hamutuk ema na’in 50 hodi koloka ba suku hotu-hotu no PSAA presiza ema na’in 386 hodi koloka kada aldeia ema na’in rua hosi totál aldeia 193.
Notísia Relevante:STAE Bobonaro rejista eleitór foun 450 iha janeiru
“Ha’u hakarak informa ba sidadaun hotu-hotu karik ita-boot sira iha interese atu konkore ba vaga PSAS no PSAA husu ita-boot sira atubele konkore ba, liuliu ba sira ne’ebé iha esperensia ba atividade eleisaun nian, iha esperiensia mos ba fó formasaun, no esperiensia ba halo enkontru komunitariu, hodi fahe netik ita-boot sira nia eperensia ne’e ba ita nia komunidade sira atu halo atividade eleisaun suku la’o ho di’ak,” nia informa ba Jornalista sira iha Maliana.
Hafoin STAE sei halo seleksaun dokumentu no sei taka rezultadu iha loron (05/08) ne’e, maibé konabá atu hahú atribui tarefa servisu sei hein orientasaun hosi nasionál liuliu Ministru Administrasaun Estatál, Tomas Cabral.
“Ema sira ne’e ita rekruta, depois ita sei fó formasaun ba sira atu ba servisu iha aldeia atu apoia organiza enkontru, halo edukasaun votante, enkontru komunitária, apoia formasaun iha nivel aldeia no suku,” Mariano esklarese.
Antes ne’e iha loron (24/07) to’o (28/07) STAE munisípiu Bobonaro mos simu dukumentu hosi konkorente vaga Operadór Sistema no Asistente Operadór Sistema.
Tuir orariu iha loron ohin (31/07) to’o (02/08) sei halo selesaun dokumentu no sei kontinua fali ba provas orál no eskrita informatika iha loron (10/08) hafoin taka sae rezultadu entre loron (11/08) ou (13/08) ne’e.
“ita seidauk sura sira na’in hirak mak hatana, tanba ita seidauk iha orientasaun atu halo selesaun dokumentu, konserteza ita presiza kada postu ema na’in rua, ida sai operadór sistema ida fali sai asistente operadór sistema,” Diretór ne’e konfirma.
STAE mos daudaun ne’e koordena ho autoridade postu atu halo planu opersionál hodi tun ba terrenu atu identifika kondisaun sede suku no sede aldeia.
Jornalista: Sergio da Cruz
Editór: Evaristo Soares Martins
