BOBONARO, 01 fevereiru 2023 (TATOLI)-Sekretariadu Tékniku Administrasaun Eleitorál (STAE) Munisípiu Bobonaro rejista eleitór foun hamutuk na’in 450-resin ha fulan-janeiru ne’e liuhosi atvidade Resensiamentu Eleitorál no Atualizasaun Baze Dadus (REABD).
Diretór STAE munisípiu Bobonaro, Mariano Viegas Amarál, esplika atividade REABD ne’e lansa iha loron 17 to’o tersa, loron 31 fulan-janeiru ne’e konsege rejista eleitór 1.032.
Notísia Relevante: STAE prepara ona modelu buletin úniku ba ema defisiénsia matan
“Hosi 1.032 ne’ebé ita rejista, eleitór foun de’it hamutuk 450 no eleitór tuan ne’ebé mak hadi’a dadus, muda hela-fatin hamutuk 582,” nia informa ba jornalista sira, iha Maliana, kuarta ne’e.
Diretór Mariano subliña, daudaun ne’e STAE destaka ona tékniku komposta hosi operadór sistema no asistente ba halo atividade REABD kobre postu administrativu neen iha munisípiu Bobonaro laran tomak.
Purtantu kona-ba atendimentu ne’e konsentra de’it iha edifísiu administrasaun postu idak-idak, maibé sei fó prioridade hodi buka tuir mós sidadaun ne’ebé ho kondisaun labele mai direita.
“Ami mós orienta tékniku sira atubele buka ita-nia ema iha sentru suku sira, liuliu ema ho defisiénsia, karik sira-nia kondisaun labele mai direitamente iha postu. Ami fó ezemplu hanesan horisehik iha postu Bobonaro, suku Tapo, ita-nia sidadaun ne’e labele mai direita iha postu, entaun ita halo koordenasaun ho autoridade postu, xefe aldeia no xefe suku, ita ba rejista konforme rekizitu ne’ebé mak iha kompletu ita rejistu kedas,” nia katak.
Nia apela ba sidadaun feto no mane ne’ebé idade atinje ona tinan 17 ba leten atu partisipa iha atividade REABD lori dokumentu komprovativu sira hanesan sertidaun nasimentu RDTL, Billete Identidade (BI) no pasaporte válidu nune’e bele hetan kartaun eleitorál utiliza ba vota.
“Hau hakarak apela ba eleitór sira-ne’ebé kaben ho ema munisípiu Bobonaro-oan, karik eleitorál sei munisípiu seluk, favór halo atualizasaun ba, bainhira prosesu votasaun, ita-boot sira bele iha direitu atu tuir eleisaun. Iha fatin ne’ebé ita-boot sira hela ba, tanba tuir lei vota ne’e jeografiamente bazea ba ita-nia kartaun eleitorál,” Diretór Mariano akresenta.
STAE hala’o resensiamentu eleitorál bazea ba Lei N.o 19/2021, 8 setembru, alterasaun dahuluk hosi lei n.o 6/2016, 25 Maiu kona-ba Lei Resensiamentu Eleitorál.
Ne’ebé tuir kalendariu STAE nian katak sei remata iha fulan juñu ne’e, maibé depende ba Prezidente Repúblika, José Manuel Ramos Horta, dekreta loron eleisaun parlamentár tinan 2023.
Tanba tuir lei antes 15 dias atividade REABD taka, nune’e STAE bele imprime lista finál votante na’in hira mak atu partisipa iha eleisaun lejizlativa ne’e.
Enkuantu, númeru eleitór iha territóriu nasionál to’o iha fulan-dezembru 2022 hamutuk 878.712 ne’ebé kompostu hosi Aileu 34.706, Ainaro 46.945, Ataúro 2.600, Baucau 98.629, Bobonaro 72.811.
Nune’e mós Cavalima 48.830, Dili 192.934, Ermera 84.361, Lautém 49.380, Liquiçá 51.925, Manatuto 35.999, Manufahi 41.574, RAEOA 53.151 no Viqueque iha eleitór hamutuk 58.867.
Entretantu eleitór ne’ebé agora resensiadu no atualizadu iha diáspora hamutuk 6.944 ne’ebé komposta hosi Austrália iha eleitór hamutuk 1.462, Korea Súl 1.237, Irlandia Norte 2.185, Portugál 1.241 no Reinu Unidu iha eleitór hamutuk 819.
Notísia relevante: STAE garante eleisaun lejislativa ho kualidade no susesu
Jornalista : Sérgio da Cruz
Editór : Evaristo Soares Martins
