DILI, 25 janeiru 2023 (TATOLI)—Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten STAE prepara ona referénsia template buletin votu no modelu biletin úniku ba ema defisiénsia matan atu bele ezerse sira-nia direitu iha eleisaun parlamentár 2023 ne’e.
Notísia Relevante: STAE garante eleisaun lejislativa ho kualidade no susesu
“Ita iha ona referénsia atu implementa template ba buletin votu no modelu buletin úniku no ita sei tau template no leitór sira bele haree no hili ba kandidatura ne’ebé tuir nia konsiénsia rasik. Maibé tenke prevee iha alterasaun nune’e iha baze legál mak ita tékniku implementa,” Acilino manuel Branco hateten ba Agência Tatoli, iha nia kna’ar fatin Caicoli, kuarta ne’e.
Tanba ne’e, nia dehan, iha alterasaun lei ne’e presiza no nesesáriu hodi prevee atu iha baze legál hodi garante nia ezekusaun tuir lei haruka., tanba membru Parlamentu Nasionál mós kestiona no espera katak iha alterasaun lei eleitorál ne’e bele prevee baze legál balun, nune’e depois fasilita lori implementasaun maluk defisiénsia matan sira-nia direitu.
“Ami halo prepasaun tékniku tanba tinan kotuk ita halo koordenasaun ho grupu defisiente sira nune’e mós ita ho UNDP fó formasaun ba sira no UNDP mós promove hela ba maluk ho kondisaun defisiénsia matan sira maibé presizamente mak iha baze legál,” nia dehan.
Aleinde ne’e, STAE ho Komisaun Nasionál Eleisaun (CNE) halo estudu komparativu ho parseiru no tékniku sira, oinsá mak bele fasilita ema ho defisiénsia matan iha eleisaun parlamentár maibé atu tékniku halo nia servisu ho profisionál mak presiza iha baze legal, nune’e prosesu sira-ne’e bele la’o.
Husu kona-ba totál ema ho defisiénsia matan, nia dehan, seidauk iha dadus sertu maibé iha ema 30 hanesan ne’e, maibé nafatin hein baze legál nune’e lori hodi haree ema ho defisiénsia matan ne’e hamutuk hira iha territóriu nasionál.
“Bainhira prevee ona iha alterasaun lei eleitorál mak ita planu sei tau template rua ka tolu iha sentru votasaun sira no ita bele lori sira hodi eskolla kandidatura ne’e rasik. Maibé buat hotu-hotu hein proposta ne’e tanba parte tékniku ita preparadu atu ezekuta,” nia esplika.
Notísia Relevante: STAE presiza brigada-ofisiál eleitorál rihun 19-resin iha eleisaun parlamentár
Jornalista : Osoria Marques
Editór : Cancio Ximenes
