DILI, 18 janeiru 2023 (TATOLI)—Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten STAE presiza brigada ho ofisiál eleitorál iha eleisaun parlamentár hamutuk rihun 19-resin.
“Eleisaun parlamentár iha tinan ne’e, ita sei rekruta ema hamutuk 20.575 no hosi númeru ne’e ofisiál eleitorál 18.000-resin, brigada 1.478 no restu ne’e ba ema-ne’ebé sei apoia postu administrativu sira,” Acilino manuel Branco hateten ba Agência Tatoli hafoin partisipa reuniaun Konsellu Ministru iha Palásiu Governu, kuarta ne’e.
Diretór STAE ne’e esplika, STAE rekruta brigada tuir sentru votasaun no ofisiál eleitorál kada estasaun sei tau ema na’in-10.
Nia informa, iha eleisaun prezidensiál sentru votasaun hamutuk 1.200 maibé tuir planu iha eleisaun lejislativu agora aumenta sentru votasaun 200-resin no estasaun votasaun ne’eb’e uluk iha 1.500 ne;e agora aumenta ba 300-resin.
Númeru eleitór to’o iha fulan-dezembru 2022 hamutuk 878.712 ne’ebé kompostu hosi Aileu 34.706, Ainaro 46.945, Ataúro 2.600, Baucau 98.629, Bobonaro 72.811, Cavalima 48.830, Dili 192.934, Ermera 84.361, Lautém 49.380, Liquiça 51.925, Manatuto 35.999, Manufahi 41.574, RAEOA 53.151 no Viqueque iha eleitór hamutuk 58.867.
Ho nune’e, eleitór ne’ebé agora resensiadu no atualizadu iha diáspora hamutuk 6.944 ne’ebé kompostu hosi Austrália iha eleitór hamutuk 1.462, Korea Súl 1.237, Irlandia do Norte 2.185, Portugál 1.241 no Reinu Unidu iha eleitór hamutuk 819 .
Notísia Relevante: Eleisaun lejislativa: STAE sei estabelese sentru votasaun 237-estasaun votasaun 320-resin
Jornalista : Osoria Marques
Editór : Cancio Ximenes
