DILI, 13 janieru 2023 (TATAOLI)–Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten STAE iha planu atu aumenta no estabelese sentru votasaun 237 no estasaun votasaun 320-resin iha eleisaun parlamentár iha territóriu nasionál no iha diáspora.
Notísia Relevante: MAE propoin estabelese sentru votasaun paralelu iha eleisaun parlamentár 2023
“Ita aumenta tanba ita hakarak lori estasaun no sentru votasaun ba ita-nia eleitór sira. Tanba ita simu no informasaun katak ami iha aldeia no suku ida de’it maibé bainhira udan ami labele vota, entaun liuhusi kestaun sira-ne’e ami halo koordenasaun ho autoridade lokál sira. Tanba ne’e mak ami seidauk konsidera loos ona tanba sei provizóriu hela presiza konfirmasaun ba asuntu ne’e,” Acilino Manuel Branco hateten Agência Tatoli, iha nia kna’ar fatin, Caicoli, sesta ne’e.
Aleinde ne’e, nia dehan, iha eleisaun lejislativa ne’e STAE nafatin atu estabelese sentru votasaun paralelu maibé muda mak nia mekanizmu katak ba eleitór ne’ebé hela iha Dili no munisípiu sira hotu, nune’e husu atu iha períodu atualizasaun baze dadus no resensiementu Eleitorál ne’e, eleitór sira atu kotribui.
Tanba, tuir nia, iha eleisaun parlamentar ne’e liu-liu ba estebelismentu sentru votasaun paralelu sei muda nia mekanizmu balun tanba uluk eleisaun prezidensiál mak liuhusi dalan barak hanesan edukasaun, saúde no Komisaun Funsaun Públika (KFP) maibé agora ne’e lae tanba hirak ne’e halo prosesu naruk tebes no ikus barak la hetan oportunidade ba ida-ne’e.
“Tanba ne’e mak ita presiza habadak mak bainhira sidadaun ida okupadu ho servisu mak nia sei direta ho STAE. Maibé tuir lei resensiamentu katak vota tuir unidade jeografiku maibé bainhira sidadaun la konsege la buat ida maibé tenke ba rejistu. Tanba ne’e mak ita-nia proposta altera no medida foun seluk laiha,” nia dehan.
Eleitór ne’ebé hela Dili la konsege atualiza nia kartaun eleitorál mak STAE aplika hodi vota iha sentu votasaun paralelu, maibé la’ós lori de’it kartaun ba vota maibé tenke lori kartaun ba rejistu nune’e bele vota.
Kona-ba ekipamentu eleisaun nian, nia dehan, presiza aumenta tanba ekipamentu balun ne’ebé aat ona tanba iha eleisaun prezidensial momentu ne’ebá udan no iha balun ne’ebé sei di’ak, maibé presiza duni aumenta tan tanba keta partidu aumenta entaun nia tamanu mós presiza haluan tan.
Jornalista : Osória Marques
Editór : Cancio Ximenes
