MALIANA, 04 agostu 2023 (TATOLI) – Sekretariadu Tékniku Administrasaun Eleitorál (STAE) Munisípiu Bobonaro, kinta ne’e halo enkontru ho líder lokál sira hanesan xefe suku sira no administradór postu administrativu hodi diskute kona-bá preparasaun atu hasoru eleisaun suku.
Diretór STAE Munisípiu Bobonaro, Mariano Viegas Amarál, esplika enkontru atu husu informasaun iha lideransa komunitária sira kona-bá kondisaun sentru votasaun iha aldeia sira, tanba eleisaun ne’e iha meza asembleia aldeia no suku.
Notísia relevante: STAE Bobonaro hahú rekruta PSAS-PSAA
“Ita-nia eleisaun ne’e sei akontese iha aldeia, tanba ne’e ita husu aldeia sira-ne’ebé iha sede aldeia, eskola no aldeia sira-ne’ebé mak eskola ho sede aldeia laiha hotu, entaun eleisaun ne’e la’o oinsá, entaun ita prepara ida ne’e nune’e ami bele aprezenta planu operasionál ba diresaun jerál STAE hodi prevee orsamentu,” nia ko’alia iha salaun administrasaun munisípál Bobonaro.
Biban ne’e, STAE mós fahe informasaun kona-ba prosesu eleisaun xefe suku bazeia Lei númeru 9/2016, 08 jullu atu nune’e xefe suku atuál sira bele habelar informasaun ba komunidade sira ne’ebé interesante atu kandidata-an iha delegadu ka delegada xefe aldeia no xefe suku.
“Maibé ami sei hein orientasaun hosi Ministru Administrasaun Estatál no Diretór Jerál STAE, depois ami sei ho diretór no prezidente autoridade ba halo sensibilizasaun,” nia katak.
Enkuantu kona-ba edukasaun votante no enkontru komunitária iha suku, Diretór Mariano dehan, sei akontese hafoin rekruta Pesoál STAE Apoia Suku (PSAS) na’in-50 no Pesoál STAE Apoia Aldeia na’in-386.
Sorin seluk xefe suku Atudara, postu administrativu Cailaco, Manuel Ximenes, sente kontente tanba eleisaun suku tinan ne’e kontinua avansa ho lei anteriór.
“Lei ne’e sei la taka dalan mai ami antigu, hanesan ha’u períodu dala tolu ona mós sei bele, tuir ha’u-nia hakarak ha’u bosan ona, maibé la bosan, lae, ita-nia rai ne’e lulik, matebian sira saudozu sira dehan ha’u soe responsabilidade, entaun ha’u sei kandidatu-aan,maibé povu mak sei julga liuhosi votu,” nia akresenta.
Notísia relevante: STAE sei sensibiliza Lei Suku iha Bobonaro
Jornalista: Sérgio da Cruz
Editór: Evaristo Soares Martins
