MALIANA, 21 jullu 2023 (TATOLI) – Sekretariadu Tékniku Administrasaun Eleitorál (STAE) sei sensibiliza Lei númeru 9/2016, 08 jullu kona-ba Suku ba komunidade no autoridade lokál sira iha munisípiu Bobonaro.
Lei Suku ne’e ho natureza jurídika asosiasaun públika no objetivu fundamentál hosi lei estabelese norma organizasaun, kompeténsia no funsionamentu suku iha territóriu nasionál. Lei suku ne’e previstu artigu hamutuk 97 no modu eleisaun xefe suku eleitu ho sufrájiu universál, livre, diretu, sekretu no pesoál.
Diretór STAE munisípiu Bobonaro, Mariano Viegas Amarál, esplika lala’ok eleisaun suku tinan ne’e sei la’o hanesan ho tinan sira liubá tanba lei laiha mudansa.
Notísia relevante: STAE prepara ona esbosu dekretu Governu ba eleisaun xefe suku
“Tempu besik ita sei halo sosializasaun (sensibiliza) lei eleisaun suku, nune’e komunidade hotu-hotu ne’ebé maka hakarak kandidata-aan ba iha delegada ka delegadu aldeia nian, xefe aldeia no xefe suku sira bele iha koñesimenetu prepara sira-nia aan,” Mariano Viegas Amaral, informa ba jornalista sira, iha Maliana, sesta ne’e.
Papél STAE iha eleisaun suku mak oinsá atu prepara planu operasionál suku, koordena ho autoridade postu, xefe suku no xefe aldeia sira bazea lei númeru 09/2016, artigu 96 ne’ebé hateten katak orgaun administrasaun eleitorál sei apoia tomak ba atividade eleisaun suku.
Lei ne’e mós hateten apoia hosi STAE nian intermu preparasaun, sei apoia mós formasaun no rekrutamentu ba pesoál sira iha suku no aldeia hodi serbisu hamutuk ho meza asembleia ne’ebé sei organiza hosi membru konsellu suku atuál.
“Ami simu orientasaun hosi diretór jerál, ita sei halo rekrutamentu ba pesoál STAE kada suku na’in-ida, depois iha aldeia pesoál sei iha rua-rua ida kada aldeia, sira atu tuir formasaun, halo enkontru komunitáriu halo edukasaun votante iha aldeia no suku, depois apoia atividade meza asembleia ninian,” nia katak.
Nia dehan, liuhosi atividade Resensiamentu Eleitorál no Atualizasaun Baze Dadus (RABD) durante fulan rua ne’e rejista eleitór hamutuk na’in-125, hahú hosi fulan-jullu eleitór 64, kompostu hosi foun 20 atualizadu 44 no to’o iha loron 21 fulan-jullu ne’e rejista eleitór na’in-81 komposta hosi foun 27 no atualizadu 54.
Diretór Mariano dehan, eleitót rejistradu hirak-ne’e mai hosi postu administrativu neen ne’ebé mai direita iha edifísiu STAE munisípiu Bobonaro.
Tuir nia, atividade RABD ne’e labele kobre postu sira kestaun rekursu umanu tanba operadór no asistente sitema sira-nia kontratu termina ona iha loron 30 fula- juñu no seidauk iha desizaun hosi Governu atu halo rekrutamentu.
“Agora ita halo atividade rúina hodi prepara ba eleisaun suku iha munisípiu de’it, ami husu ba komunidade munisípiu Bobonaro, liuliu sira-ne’ebé mak atinje ona idade 17 ba leten, husu ita-boot sira atu bele hakbesik-aan mai edifísiu STAE munisípiu nune’e bele rejista aan hodi hetan kartaun eleitorál, ba sira-ne’ebé foun no sira-ne’ebé idozu no invalidés,” nia apela.
Enkuantu tuir dadus eleitór munisípiu Bobonaro ne’ebé elijível partisipa iha eleisaun parlamentár 21 maiu 2023 ne’e na’in-72,537.
Notísia relevante: STAE Bobonaro hahú halo espozisaun lista eleitór iha suku 50
Jornalista : Sérgio da Cruz
Editór : Evaristo Soares Martins
