DILI, 13 jullu 2023 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten STAE prepara ona esbosu dekretu Governu ba eleisaun xefe suku iha tinan 2023.
Notísia Relevante: STAE prevee millaun $9 ba eleisaun xefe suku
“Atu lori regulariza ba iha formasaun meza aldeia ne’e nia data mak tenke aprova liuhosi dekretu Governo ida. Entaun, neste momentu, brigada jurídiku STAE nian fó instrusaun atu elabora esbosu ida ba dekretu Governu ida ho nia referénsia hanesan eleisaun anteriór sira,” nia dehan ba Agência Tatoli, iha nia kna’ar fatin Caicoli, kuarta ne’e.
Tanba, nia dehan, uluk eleisaun xefe suku iha 2016 iha votasau dahuluk akontese iha 28 outubru 2016 no votasaun daruak akontese iha 13 novembru 2016, nune’e presiza konfirma hodi data bele hanesan maibé konfirma loron ne’e monu iha sá loron atu garante di’ak liután.
“Dekretu Governu ne’e podeser tarde liu semana oin, tanba esbosu ne’e iha ona nune’e bele entrega ba Ministéiru Administrasaun Estatál no lori ba Konsellu Ministru hodi hetan apresiasaun no aprovasaun, para depois halo sensibilizasaun,” nia dehan.
Enkuantu, eis Ministru Administrasaun Estatál (MAE), Miguel Pereira de Carvalho, hateten Governu prevee ona millaun $9 tau iha dotasaun todo Governo hodi realiza eleisaun suku ba despeza utiliza iha asembleia aldeia no asembleia eleitorál suku nian, presiza apoiu hosi órgaun administrasaun eleitorál, konforme lei númeru 9/2016 ba eleisaun mandatu membru konsellu suku sira hotu-hotu.
Jornalista : Osória Marques
Editór : Cancio Ximenes
