DILI, 12 Marsu 2026 (TATOLI)—Diretór Ezekutivu Empreza Aero Dili, Lorenço de Oliveira, konsidera xave ba prosesu investimentu komersiál depende ba kapasitasaun rekursu umanu la’ós husi fundu.
Investimentu ne’e área ida-ne’ebé luan, risku, ema-ne’e rasik tenke brani no presiza iha koñesimentu ba área ne’ebé hakarak atu investe ba.
“Antes ha’u atu halo investimentu buat importante ida mak ha’u tenke hatene uluk saida mak aviasaun, entaun ninia xave mak rekursu umanu. Tanba se ita seidauk guia rekursu umanu ho di’ak mak ita sei nafatin aprende mós ho ema seluk hodi sai péritu ba ita-nia ema,” Diretór Aero Dili ne’e informa ba Agência Tatoli liuhusi programa “Entrevista Eskluziva” iha estúdiu, Faról, ohin..
Nia hateten, tanba prosesu kresimentu ba investimentu ida-ne’e ita tenke aprende buat barak, aprende dahuluk mak husi risku ka obstakulu ne’ebé bele sai matéria ba ita atu sai maduru. Signifika tenke iha pasiénsia no iha paixaun maibé tenke iha mós esforsu hodi realiza mehi.
“Tanba se ita laiha koñesimentu entaun ita sei labele hetan osan, tenke iha estratéjia oinsá para iha esperiénsia atu ema bele tau konfiansa ba ita no apoiu ita-nia investimentu. Hanesan mós ho ha’u-nia koñesimentu ne’ebé iha, ha’u bele investe iha komersiál nian no ida-ne’e tanba ha’u la rende atu aprende,” nia dehan.
Nia hatutan, tenke define didi’ak benefísiu husi investimentu ne’ebé hakarak implementa, signifika benefísiu la’ós de’it ba empreza maibé mós ba konsumidór sira liuliu konektividade ekonómia bilaterál, tanba husi sira-nia konfiansa mak promove liután komérsiu ne’e rasik.
Jornalista : Alexandra da Costa
Editór : Cancio Ximenes
