Asidente Tráfegu rua rezulta vítima na’in-tolu lakon vida iha Baukau
BAUKAU, 16 Marsu 2026 (TATOLI)—Asidente Tráfegu rua ne’ebé akontese iha área Lanud no Kaisidu, Postu Administrativu Baukau Vila, rezulta ema na’in-tolu lakon vida iha loron Sesta (13/03/2026).
Komadante Polísia Munisipiu Baukau, Superintendente Polísia João Sancho Pires, esplika asidente ida akontese xoke malu entre motór iha estrada nasionál diresaun Lanud-Baukau ne’ebé vítima ho inisiál JG idade 38 nu’udár karpinteiru utiliza motór marka Jupiter MX xapa matríkula K.2369 xoke malu ho vítima JSB idade 40 profisaun nu’udár médiku iha-ne’ebé vítima rua lakon hotu vida tanba hetan pankada iha parte ulun.
Enkuantu, vítima GMP idade 25 lakon vida bainhira kondús motór marka Mio xapa matríkula O.1743 mosu asidente sengulár iha-ne’ebé suspeita vítima kondisaun lanu no kondisaun motór laiha lampu nune’e halai sai husi estrada no rezulta mate fatin, tanba hetan pankada iha parte ulun.
“Motór rua-ne’e mak hasoru malu no momentu ne’e kalohan maka’as hela mosu hanesan ne’e no vítima ida lakon vida iha Kaisidu,” Komadante Polísia Munisipiu Baukau, Superintendente Polísia João Sancho Pires hateten iha ninia kna’ar fatin, Vila Nova, Baukau, Segunda ne’e.
Superintendente Polísia Pires rejeita informasaun relasiona ho suspeita asidente Lanud vítima lakon vida tanba xoke husi Kareta marka Carry ne’e laloos tanba rezultadu identifikasaun ba kareta referida halo manutensaun antes iha Postu Administrativu Laleia, Munisípiu Manatutu, antes akontese asidente iha Lanud.
Aleinde ne’e, rezultadu identifikasaun hatudu indísiu forte vítima rua xoke malu bainhira kondisaun motór rua ne’e estragu iha parte oin.
“Realidade ne’ebé iha motór ho motór mak xoke malu, la’ós kareta mak soke,” Superintendente Polísia Pires akresenta.
Jornalista: Natalino Belo
Editór: Xisto Freitas da Piedade
