OEKUSI, 25 Marsu 2026 (TATOLI) – Molok implementa projetu PNDS tinan fizkál 2026, Ekipa Programa Nasionál Dezenvolvimentu Suku (PNDS), kuarta ne’e, hala’o diseminasaun manuál operasaun programa PNDS ba entidade relevante sira iha Rejiaun Administrativa Espesiál Oekusi Ambeno (RAEOA).
Diretora Nasionál Kapasitasaun Monitorizasaun no avaliasaun, Zelia Freitas da Conçeição, hateten, diseminasaun ne’e kada tinan realiza ho objetivu atu desimina informasaun kona-ba lala’ok implementasaun PNDS nian, karik iha mudansa dekretu-lei ruma, relasaun ho implementasaun programa PNDS nian, presiza disemina ba diretór serbisu munisipál sira ho autoridade lokál sira, atu nafatin akompaña lala’ok PNDS iha munisípiu liliu suku no aldeia sira.
“Agora atu tama trimestre daruak, hanesan faze preparasaun implementasaun projetu PNDS iha Oekusi, tanba nia orsamentu mai husi Orsamentu Jerál Estadu kategória transferénsia públika, no daudaun ne’e transfere ona ba konta bankaria suku 20 iha Oekusi, entaun molok implementa presiza hala’o disemina uluk atu hatene kona-ba nia lala’ok,” nia hateten iha salaun administrasaun Oekusi, ohin.
Notísia relevante:Tinan ne’e, PNDS Oekusi sei ezekuta projetu 22 ho kustu rihun $900-resin
Nia esplika, programa PNDS iha Oekusi tinan ne’e sei implementa projetu 23, no daudaun ne’e tama ona prosesu aprovizionamentu, no tuir kalendáriu sei hahú implementa iha inisíu fulan-Abríl.
“Inísiu Abríl implementa to’o fin Setembru 2026 tenke konklui projetu hirak-ne’e, nune’e to’o fin Dezembru, ita haree ona balansu orsamentu, katak tuir lei Orsamentu Jerál Estadu, iha 31 Dezembru osan hothotu bainhira la ezekuta tenke fila ba kofre Estadu, tanba ne’e ita hotu tenke esforsa atu finaliza obra sira iha Setembru to’o Outubru tuir kalendáriu ne’ebé iha ona,” nia hateten.
Notísia relevante:PNDS Oekusi aprova projetu rua hodi implementa iha suku Monemeko no Kutete
Iha biban ne’e, Diretór Diresaun Rejionál Administrasaun Oekusi, José Tanesib Anunu, enkoraja autoridade komunitária sira atu koopera, nune’e implementasaun projetu prioridade PNDS iha Oekusi be;e finaliza ho susesu.
“Implementasaun ne’e lalika tarde tanba ita-nia Primeiru-Ministru mós ko’alia bebeik, tenki serbisu tanba osan ne’ebé planeia ona tenki ezekuta ho responsabilidade, entaun ita haka’as an atu kumpre kaléndariu implementasaun, katak kuandu Abríl hahú tenke remata iha Setembru, atu hetan nia susesu ida-ne’e tenki serbisu hamutuk, xefe suku no jestór sira, tenki akompaña prossu ne’e, tanba projetu sira-ne’e direita ba ita-boot sira iha nível aldeia, tanba projetu ne’e pakote, kuandu ida falla entaun prejudika mós planu tinan oin mai,” nia hateten.
Notísia relevante:Autoridade Bene-Ufe Nítibe espera PNDS Oekusi aselera konstrusaun EBF Bítila
Entretantu, partisipa iha atividade diseminasaun ne’e, mai husi xefe suku 20 ho xefe aldeia sira, jestór sub-rejiaun haat, diretór no kargu xefia sira.
Jornalista: Abílio Elo Nini
Editór: Rafael Ximenes de A. Belo
