Autoridade Bene-Ufe Nítibe espera PNDS Oekusi aselera konstrusaun EBF Bítila

OEKUSI, 22 Outubru 2025 (TATOLI) – Xefe suku Bene-Ufe Marcos Meni, rekomenda ba ekipa Programa Nasionál Dezenvolvimentu Suku (PNDS) Rejiaun Administrativa Espesiál Oekusi Ambeno (RAEOA) atu aselera konstrusaun projetu Eskola Bázika Filiál (EBF) Bítila ne’ebé lokaliza iha aldeia Mánan suku Bene-Ufe, nune’e molok udan monu rai estudante sira bele utiliza on aba prosesu ensinu aprendizajen.

“Ha’u haree konstrusaun ne’e la’o di’ak. Semana kotuk ami enkontru ona ho PNDS, sira dehan atinje ona 50%, maibé ami rekomenda nafatin se bele aselera tanba agora atu tama ona tempu udan, entaun sei difikulta mobilizasaun materiál, estudante sira mós presiza utiliza ona eskola foun ne’e,” nia hateten.

Notísia relevante:Komunidade Bene-Ufe rekomenda hadi’a lutu no apoia profesór ba EBF Bítila

Hatan ba rekomendasaun sira-ne’e, Diretór PNDS Oekusi, João Evaristo Bobo, klarifika katak, konstrusaun EBF Bítila, nia progresu fiziku daudaun atinje ona 70% no tuir planu sei konklui iha inísiu Novembru 2025.

“Projetu EBF Bítila agora nia serbisu fíziku to’o ona 70%, ne’ebé agora serbisu kontinua la’o hela, tanba ita hakarak antes udan tenke entrega ba eskola atu uza,” nia hateten.

Nia epslika, husi pursentu 70% ne’e, serbisu fíziku kuaze konkluidu ona, tanba reboka hotu ona, hela de’it serbisu planfon monta keramik inklui monta odamatan no jendela sira.

“Agora serbisu todan mak ida-ne’e de’it, tanba kalén taka ona, depois monta odamatan no jendela sira, tau tan keramik hotu ona, ne’ebé ita-nia tarjetu tenki finaliza iha inisíu Novembru ne’e,” nia hateten.

Notísia relevante:Komandu F-FDTL apoia materiál desportiva ho livru istória ba EBF Bítila

Entretantu, konstrusaun ne’e ezekuta husi Ekipa Jestaun Suku ho montante rihun $48,750.00 ho durasaun tempu durante fulan haat, ba sala tolu inklui eskritóriu ida.

Jornalista: Abílio Elo Nini

Editór: Rafael Ximenes de A. Belo