DILI, 25 Marsu 2026 (TATOLI)—Tersa feira ne’e Governu liuhusi Ministériu Transporte Komunikasaun (MTK) halo enkontru ho Empreza Aerodili atu kontinua koordena servisu hamutuk ho emprezáriu timoroan atu apoiu servisu aviasaun ba preparasaun Timor-Leste sai prezidénsia Asosiasaun Nasaun Sudeste Aziátiku (ASEAN) iha tinan 2029.
Ministru Transporte Komunikasaun, Miguel Gonçalves Manetelu, hateten iha diálogu ne’e Governu hakarak servisu hamutuk ho emprezáriu timoroan iha área aviasaun, tanba foin daudauk iha diálogu entre setór privadu no Governu iha CCD.
“Ha’u bolu duni na’in ba Aero Dili, oinsá atu haree medida sira-ne’ebé ita atu foti iha future, atu labele hamate emprezáriu timoroan. Ne’ebé, husi parte empreza hateten atu apoiu Timor-Leste ne’ebé sei sai prezidénsia ASEAN 2029, liuliu iha área aviasaun nian, entaun ne’e loos ona,” Ministru ne’e informa ba jornalista sira iha Palásiu Governu, kuarta (25/03) ne’e.
Estadu nia obrigasaun ne’e mak atu asina air service agreement ho nasaun membru ASEAN inklui nasaun sira seluk, entaun aviaun atu semo ka la semo ne’e depende ba empreza, hanesan Aero Dili esforsu atu espanda nia voo ba Austrália no Malázia.
“Entaun empreza hakarak espanda nia voo ne’e ninia direitu tanba Governu loke tiha ona dalan liuhusi asina air services agreement,” nia esplika.
Diretór Ezekutivu Empreza Aero Dili, Lorenço de Oliveira, hateten hasoru malu ho Ministru Miguel Manetelu, atu halo koordenasaun servisu iha área aviasaun nian, oinsá mak Timor-Leste prepara nia an ba 2029, tanba Timor-Leste sei sai Prezidénsia ba ASEAN.
“Tanba hanesan ita hatene katak bainhira ita asume prezidénsia ASEAN, normalmente sei iha reuniaun entre nasaun membru iha ne’e, entaun oinsá ita-nia preparasaun iha parte aviasaun nian,” nia hateten.
Nia hatutan, signifika sira sei halo voo ba nasaun membru sira, ne’ebé fasilita sira-nia viajen mai Timor, enkuantu ida-ne’e la’os tula de’it delegasaun sira maibé sei tula mós pasajeiru sira-ne’ebé atu halo viajen tanba tula de’it delegasaun ne’e sei fó impaktu ba sira-nia rendimentu.
Jornalista : Alexandra da Costa
Editór : Cancio Ximenes
