DILI, 03 Juñu 2026 (TATOLI)—Inspesaun Jerál Traballu (IJT), iha tinan 2026, fó ona vistu traballu ba traballadór no empregadór estranjeiru iha Timor hamutuk 4.567 no iha tinan 2025 hamutuk 9.705.
Traballadór no empregadór sira-ne’e kompostu husi Austrália, Amérika, Británia, Brazíl, Bangladesh, Xina, Kuba, Filipina, Fiji, Fransa, Indonézia, Irlándia, India, Malázia, Meksiko, Nova Zelándia, Nederland, Nepal, Singapura, Srilanka, Swedia, Pakistaun, Vietname, Tailándia, Japaun, Rúsia, Kenia, Korea, Portugál no seluk tan.
Inspetór Inspesaun Jerál Traballu, Frederico Pereira de Matos (IJT), Frederico Pereira de Matos, hateten IJT mós halo kontrolu ba traballadór estranjeiru liuliu sira-neʼebé ligasaun ho servisu no loke negósiu entaun sira tenke mai trata sira-nia pedidu vistu traballu iha IJT, prosesu dahuluk tenke liuhusi migrasaun.
“Atu ami bele hetan paresér, katak ema hirak ne’e bele hetan vistu traballu ka labele. Neʼebé, baibain ami konsidera hanesan paresér favoravel no desfavoravel. Ami mós sei halo inspesaun ba traballadór estranjeiru ne’e sira-nia servisu fatin hodi hatene detallu kona-ba sira-nia pedidu trata vistu traballu,” Inspetór ne’e informa ba Agência Tatoli iha nia kna’ar fatin, Hudi Laran, ohin.
IJT tenke halo inspesaun ba sira-nia fatin atu hatene sira-nia kompañia nia naran, área servisu no lokalizasaun servisu, entaun ida-ne’e mak IJT halo molok fó paresér ba migrasaun hodi emite vistu traballu.
“Maibé bainhira traballadór estranjeiru sira-ne’e muda ona sira-nia servisu fatin ka servisu fali iha fatin seluk, sira tenke informa ba IJT atu halo renovasaun ba sira-nia vistu. Nune’e IJT mós nafatin bele halo kontrola sira ho di’ak, tanba se lae ita bele konsidera esploitasaun umanu husi kompañia sira,” nia dehan.
Nia hatutan, IJT emite vistu traballu estranjeiru ba ema hirak ne’ebé servisu iha setór privadu, enkuantu iha setór públiku hanesan instituisaun Estadu nian ne’e emite direta husi Komisaun Funsaun Públiku (KFP) la’ós IJT.
“Maibé bazeia ba dadus traballadór no empregadór estranjeiru barak liu mak husi nasaun Indonézia no Xina, tanba dalaruma sira mai lori ho sira-nia ema atu servisu liuliu iha área konstrusaun,” nia dehan.
Jornslista : Alexandra da Costa
Editór : Cancio Ximenes
