AINARU, 20 Abríl 2026 (TATOLI)—Prezidente Autoridade Munisípiu Ainaru, Manuela Georgina Carmo Bucar Corte Real, hateten Ainaru iha poténsia boot ba mármore mean no bele dezenvolve hodi kontribui reseita bainhira munisípiu ne’e avansa ba Desentralizadaun Podér Lokál.
“Kona-ba Desentralizasaun Ainaru prontu, ita iha poténsia boot barak, ida mak mármore mean ne’e, ita Ainaru barak tebes. Ida-ne’e ba futuru bele dezenvolve hodi kontribui reseita,” Prezidente Autoridade Munisípiu Ainaru, Manuela Georgina Carmo Bucar Corte Real, hateten ba jornalista sira iha Salaun Sara Maubissi, segunda ne’e.
Nia dehan, mármore mean lokaliza iha Postu Administrativu Maubisse no bainhira Santu Padre Francisco vizita Timor-Leste iha tinan 2024 ne’e, Timor-Leste utiliza mármore mean husi Maubisse hodi infeta iha fatin misa Tasi-Tolu.
“Mármore mean ne’e kuandu Amu Papa atu mai, ita mak ofrese mármore mean hodi ba tau iha Tasi-Tolu. Manatutu lori mármore mutin. Ida-ne’e, ita-nia potensia barak loos,” nia dehan.
Nia hatutan, Ainaru la’ós poténsia de’it ba mármore mean, maibé iha paisajen ne’ebé furak no bainhira dezenvolve ho di’ak ne’e -, bele dada turista sira mai vizita fatin ne’e no bele kontribui reseita.
Iha parte seluk, Ainaru mós iha poténsia ba animál hanesan karau ne’ebé barak tebes. Governu presiza tau atensaun hodi dezenvolve no la’ós animál de’it maibé Ainaru iha mód aihan hanesan batar ho tipu rua ida mak sele ho noi-mutin ne’ebé enjñneiru timoroan ida mak halo peskiza hetan no agora espalla ona iha Ainaru laran ho kualidade ne’ebé di’ak.
Jornalista : Hortêncio Sanchez
Editór : Cancio Ximenes
