VIKEKE, 21 Abríl 2026 (TATOLI)—Xefe Grupu Maluru, Venâncio Soares, aprezenta preokupasaun ba Prezidente Repúblika (PR), José Ramos-Horta kona-ba ekipamentu agríkola no hadi’a irrigasaun ne’ebé aat hodi fasilita agrikultór sira halo natar.
“Durante ne’e ami preokupa ba ekipamentu liuliu tratór ki’ik halai natar nian, tanba ami kuandu halai natar ami aluga tratór mak foin halai ami-nia natar. Tan ne’e, presiza tulun ami apoiu ekipamentu tratór rua ba ami hodi ami uza. Aleinde ne’e, ami husu reabilita irrigasaun ne’ebé daudaun ne’e kondisaun ladún di’ak. Daudaun ne’e ami esforsu halo natar uza de’it udan-been hodi halo natar. Tan ne’e, ha’u hakarak aprezenta ba PR Ramos Horta ne’ebé mai vizita ona ami,” Venâncio Soares hateten iha lansamentu kuda hare iha natar Suku Maluru, Tersa ne’e.
Hatán ba ida-ne’e, Prezidente Repúblika (PR), Ramos Horta, haktuir dalabarak sempre ko’alia agrikultura, maibé agrikultura kontinua fraku—problema irrigasaun, tenke tau-matan no ekipamentu agríkola ba agrikultura sira.
“Tinan barak ita ko’alia beibeik agrikultura. Agrikultura kontinua fraku iha irrigasaun. Tan ne’e, presiza tau-matan ba irrigasuan sira no halo manutensaun, tulun ekipamentu ba agrikultór sira,” xefe Estadu tenik.
Entretantu, Ministru Agrikultura, Peska, Pekuária no Floresta, Marcos da Cruz, informa iha tinan hirak liubá Ministériu Agrikultura, Peska, Pekuária no Floresta (MAPPF) halo irrigasaun, maibé agrikultór sira la utiliza halo natar, más iha tinan ida-ne’e agrikultór sira komesa iha inisiativa rasik halo natar.
“Ida-ne’e hatudu ona sira-nia vontade. Ita sei apoia tratór ki’ik rua ba grupu agrikultór sira uza halai natar. Maibé, grupu agrkultór ba foti rasik iha iha Dili. Nune’e mós ha’u husu agrikultór sira nafatin iha vontade servisu iha hala’o atividade agrikultura iha área Maluru, Beasu, Vikeke Vila,” nia hato’o.
Partisipa iha serimónia lansamentu kuda hare ne’e kompostu husi Prezidente Repúblika ho komitiva, prezidente autoridade Munisípiu Vikeke, autoridade lokál no grupu agrikultór sira iha Suku Maluru.
Jornalista: Vitorino Lopes da Costa
Editór: Xisto Freitas da Piedade
