AILEU, 08 Jullu 2026 (TATOLI)—Governu liuhusi Ministériu Dezenvolvimentu Rurál no Abitasaun Komunitária (MDRHC) kontinua garante kresimentu ekonomia no empregu liuhusi kapasitasaun dezenvolvimentu rurál ba grupu benefisiáriu sira iha munisípiu Aileu.
Diretór Diresaun Nasionál Inovasaun Promosaun no Kapasitasaun, Manuel Maria dos Santos, hateten tuir nia haree formasaun durante loron rua ne’e benefisiáriu sira entende di’ak no iha vontade hakarak rona no aprende matéria sira hodi aplika fali iha sira-nia atividade negósiu.
“Ha’u hanoin ita presiza formasaun sira hanesan ne’e maske Governu sempre fó subvensaun ba benefisiariu sira, entaun oinsá jere osan no investe sira-nia atividade hodi hetan rezultadu di’ak,” Diretór ne’e relata ba Agência TATOLI ilha sentru juventude Aissirimou Aileu, ohin.
Nune’e, nia dehan, tenke enkoraja malu no nafatin servisu hamutuk hodi promove kresimentu ekonomia família, grupu no sosiedade.
Enkuantu, programa dezenvolvimentu rurál ne’e sira mós destaka ekipa husi Ministériu hodi halo kontrola no monitorizasaun ba atividade negósiu husi grupu benefisiáriu sira, atu nune’e fundu ne’ebé Governu fó bele iha ninia vantajen.
Bainhira grupu balun ne’ebé hetan ona fundu husi Governu maibé laiha implementasaun ruma iha terrenu, sira sei tun ba rezolve hodi enkoraja benefisiáriu sira maibé nafatin viola entaun sei foti medida rekomendasaun ba parte auditória hodi rezolve.
“Tanba ita iha kritéria ekipa Ministériu nian sei tun ba terrenu hodi forma Sentru Dezenvolvimentu Aldeia no harii estrutura ema na’in-hitu hodi kria grupu iha komunidade. Iha tinan kotuk, ita apoiu aldeia 10 iha Aileu,” nia esplika.
Koordenadór Dezenvolvimentu iha suku Fahiria, Alberto Lou-Teus, hateten hanesan benefisiáriu ba programa abitasaun komunitária sente formasaun ida-ne’e importante tebes atu aumenta koñesimentu kle’an ba kapasidade hodi eleva grupu ne’ebé sustentavel iha futuru.
Tanba, nia dehan, sira mós sai benefisiáriu husi MDRHC hodi implementa tipu atividade rua mak ortikultura no pekuária.
“Tanba durante ne’e, sira iha dezafiu hanesan laiha konsiénsia no komunikasaun di’ak entre membru sira ka sira seidauk intende kona-ba servisu koletiva, entaun ita tenke partisipa ativu iha prosesu sira-ne’e,” nia dehan.
Tanba ne’e, nia rekomenda ba Governu atu kontinua fasilita formasaun ne’e ka labele to’o de’it iha ne’e ka ba nia la sufisiente, tanba iha matéria barak ne’ebé nia presiza aprende maske balun akapta ona no balun seidauk.
“Se bele formasaun ida ne’e beibeik maske neineik hodi aumenta ita-nia koñesimentu no abilidade hodi estabelese programa ne’e ho di’ak,” nia hateten.
Enkuantu iha loron daruak nian tópiku ne’ebé sira ko’alia mak kona-ba institusionalizasaun organizasaun baze komunitária liuhusi kuadru sustentavel ida ba dezenvolvimentu rurál ne’ebé lidera husi komunidade, modelu negósiu online dijitál hodi promove no faan produtu no kooperativa produsaun agrikola no empreendedorizmu rurál ba dezenvolvimentu ekonómiku lokál
Jornalista : Alexandra da Costa
Editór : Cancio Ximenes
