DILI, 22 abríl 2026 (TATOLI) –Ministru Interiór Francisco da Costa Guterres informa katak MI no Komandu Jerál Polísia Nasionál Timor-Leste (PNTL) halo ona enkontru hodi halo ona diskusaun ba reabertura rekrutamentu vaga membru Polísia.
“Loos ona, imi prepara aan hein de’it ona diploma Ministeriál hodi bele prepara ninian prosesu de teste ninian. Buat hotu horseik sira halo enkontru ikus ho mós instituisaun relevante sira seluk, hodi haree sai ona diploma ministeriál ita hahú fali prosesu ne’e”, Ministru Francisco hateten ba jornalista sira hafoin partisipa reuniaun Konsellu Ministru iha Palásiu Governu kuarta, ohin.
Autoridade governativa ne’e dehan, Ministériu Interiór no Komandu PNTL konkorda hodi halo uluk rekrutamentu ema na’in -400 iha vaga ne’e.
“Hein lai ita avansa uluk lai 400, ita rezolve tiha problema sira ne’e lai depois mak ita sei loke tan”, nia relata.
Nia dehan, vaga rekrutamentu membru PNTL foun ne’e sei hahú iha Maiu tinan ne’e bainhira Diploma Ministeriál ne’e iha ona, tanba Diploma Ministeriál nu’udar baze legál tanba ne’e mak importante para bele gia komisaun lao tuir.
“Se la’ós fulan Abríl nian laran, entaun fulan-Maiu ita hahú fali ona,” Ministru Interiór Francisco da Costa Guterres informa.
Ministru dehan, kona-ba osan ba rekrutamentu ne’e Governu liuhusi Mínisteriu Interiór prevee ona ne’e, rekrutamentu ne’e la gasta osan barak tanba iha de’it teste psikoteste ho teste saúde, enkuantu teste prova kultura ne’e Ministériu Interiór koopera ho Funsaun Públika hodi provedénsia sasán sira ne’ebé hotu hodi uza halo teste tanba ne’e kustu boot.
Governante ne’e dehan, tuir rezolusaun ne’ebé foin dadaun sai ne’e katak ba kandidatu ne’ebé antes ne’e kokore ba vaga rekrutamentu membru PNTL foun 2025 ne’ebé hamutuk rihun 12-resin ne’e mak sei tuir fali teste no teste agora eleminatóriu hotu.
Nia esplika, “Ita tenke forma fali komisaun foun, juri foun enkuantu komisaun supervizasun monitorizasaun ita sei presiza sira balun ne’ebé sei kontinua tanba sira mak hatene buat barak nune’e deteta buat barak ho sira-nia esperiénsia ne’e hotu hodi akompaña prosesu ne’e la’o ho di’ak”.
Ministru Francisco Guterres informa tan katak juri ba rekrutamentu ne’e sei troka totalmente. Sekretáriuadu mós troka totalmente tau fali foun. “Sekretáriudu ne’e mistu ida, husi Austrália no mós Portugál mak hola parte iha ne’e”.
Governante ne’e dehan, Governu presiza Austrália no Portugal iha rekrutamentu ne’e tanba iha rekrutamentu ne’ebé liu ba ne’e, bainhira Governu fó fiar ba polísia atu halo maibé sira laiha konfiansa no rekrutamentu ne’e la susesu.
“Ita tenke presiza ema tanba ita fiar malu to’o ikus ita la fiar malu, entaun ita tenke presiza ema para ninian matenek fó hanoin ba ita atu bele la’o ita uza Timoroan”, nia dehan.
“Ita rasik uluk ita halo uluk ona rekrutamentu ho apoiu GNR de’it ita halo di’ak kapás 2010, 2011 too 2013 la’o di’ak hela, maibé ida ne’e mak sai tiha problema tanba ne’e mak kuidadu fila fali para labele estraga mekanizmu ne’ebé mak iha no mekanismu ne’ebé iha ona ne’e ita labele halo rauhun fali mekanizmu ne’ebé iha”, Francisco Guterres énfaze.
Governante ne’e akresenta, Sekretáriudu ba rekrutamentu kandidatu vaga foun sei tau iha Komandu Jerál PNTL inklui juri mós sei mai husi PNTL hotu.
“Ita entrega ba Komandu tau hela Komandu ne’ebá sekretáriu husi Komandu juri mós ami sei iha diskusaun nia laran maibé preferénsia ne’e mai ba polísia”, nia dehan.
Jornalista: Natalino Costa
Editor: Rafael Ximenes de A. Belo
