KOVALIMA, 01 Maiu 2026 (TATOLI)- Komandante Jerál (KomJer),Polísia Nasionál Timor-Leste (PNTL), Komisáriu Asistente Polísia Afonso dos Santos, alerta ba membru Polísia Nasionál Timor-Leste (PNTL) iha munisípiu Kovalima atu presta servisu ho profesionál no tuir lei ne’ebé vigora ona.
“Ha’u husu ba membru PNTL bainhira halo atuasaun presiza tuir lei ne’ebé mak vigora ona. Atuasaun labele fora husi lei bainhira laloos sei foti medida tanba bainhira presta servisu bazeia ba lei”, Komisáriu Asistente Polísia Afonso dos Santos , hato’o bainhira hala’o vizita iha munisípiu Kovalima, ohin.
Komandante PNTL ne’e husu ba membru sira tenke servisu ho profisionál tanba Munisípiu Kovalima viziñu Indonézia.
“Ha’u husu ba ita boot sira labele kria divizionizmu iha munisípiu Kovalima, hotu-hotu hamutuk labele haree ba tetun terik , bunak no kemak maibé hanoin ida de’it atu halo dezenvolvimentu iha Kovalima. Presiza atu respeita mós veteranu sira tanba Timor hetan ukun rasik aan tanba mai husi veteranu sira.
Komisáriu Asistente Polísia ne’e afirma menus membru PNTL iha Kovalima iha ona planu atu aumenta tan membru 200.
“ Kona-bá membru PNTL menus, ha’u nia Komandante administrativu foti ona ba futuru Kovalima iha membru PNTL na’in-200 atu servisu ba povu no haree asuntu seguransa,” nia esplika.
Iha biban hanesan, Prezidente Autoridade Munisípiu (PAM), Kovalima, Miguel Armada Cardoso, hato’o agradese tanba biban di’ak bainhira simu vizita husi Komandante PNTL.
“Autoridade Kovalima orgullu atu servisu hamutuk ita hatene katak Kovalima hela besik fronteira ho total populasaun rihun 92-resin no Kovalima baliza ho viziñu Indonézia, ho personil ne’ebé mak iha la sufisente ba Kovalima atu responde seguransa iha Kovalima”,Prezidente Autoridade Munisípiu Kovalima dehan.
Munisípiu Kovalima iha nia postu Administrativu hamutuk hitu mak hanesan,Fatululik, Fatumea, Fohorem, Tilomar, Maucatar, Suai no Zumalai ho nia suku 30 ,aldeia 148 no nia populasaun rihun 92-resin.
Tuir dadus husi, Komandante PNTL Munisípiu Kovalima,Superintendente Xefe, Paulino Carmo Ferreira, katak membru PNTL iha Kovalima hamutuk 159 hodi koloka ba eskuadra postu administrativu hitu no balun iha komandu PNTL Munisípiu Kovalima.
“Iha komandu PNTL Kovalima hamutuk 159 husi númeru Ofisiál Superintendente na’in-7, superintendente xefe na’in -ida, seluk Inspetór husi Inspetór asistente, Inspetór no Inspetór xefe, Sarjentu, Sarjentu Xefe, Ajente Xefe no Ajente prinsipál,” nia informa.
Jornalista:Celestina Teles
Editór: Florencio Miranda Ximenes
