DILI, 14 Maiu 2026 (TATOLI)—Prezidente Konsellu Administrasaun Institutu Nasionál Seguransa Sosiál (INSS), Zeferino da Costa Bobo, informa pagamentu faze dahuluk konklui ona iha 24 Abríl liubá no daudaun ne’e hahú prepara ba pagamentu daruak iha Juñu tinan-ne’e.
“Ita pagamentu ba ferik-katuas ne’ebé la’o di’ak ne’e ramata iha 24 Abríl liubá. Daudaun ne’e ita kontinua halo pagamentu ba benefisiáriu ne’ebé moras labele la’o, kondisaun defisiénsia no sira-ne’ebé la’o labele. Maibé, ita mós agora prepara hodi halo pagamentu ba faze daruak nian. Ita sei konta hosi Abríl, Maiu no Juñu, entaun iha fulan-Juñu ita hahú halo pagamentu,” nia dehan ba TATOLI iha nia kna’ar fatin, Kaikoli, Kinta ne’e.
Bobo dehan pagamentu faze daruak ne’e mantein ho númeru ne’e, tanba sei hein relatóriu mak foin hatene benefisiáriu hira mak mate, maibé atu dehan osan ho númeru nafatin uza ida-ne’e hodi halo pagamentu.
Nune’e, biban ne’e apela ba família benefisiáriu atu labele lori benefisiáriu ne’ebé ho kondisaun moras grave, moras defisiénsia no benefisiáriu ne’ebé labele la’o mai iha sentru pagamentu ka sede suku tanba INSS ho BNCTL sei to’o iha benefisiáriu sira-nia fatin.
“Ita baibain hateten sira-ne’ebé mak bele la’o ka bele movimenta mak mai iha sede suku para simu. Ba sira-ne’ebé labele la’o ne’e ita avizu bainhira iha abertura, maibé ema nia pensamentu ne’e mak sempre hakarak halo hanesan ne’e,” nia haktuir.
Totál osan ne’ebé atu selu ba pensaun sosiál ne’e hamutuk $22.019.682 ba benefisiáriu hamutuk 107.692, kompostu husi ferik-katuas 97.105 ho nia osan $20.286.642. Ba benefisiáriu ne’ebé kondisaun moras, defisiénsia hamutuk 10.587 ho nia osan hamutuk $1.733.040.
Solisita funsionáriu reformadu kompleta dadus
Iha parte seluk, Prezidente Konsellu Administrasaun Institutu Nasionál Seguransa Sosiál, solisita ba funsionáriu reformadu atu kompleta dadus nune’e bele hetan direitu pensaun ne’e.
“Ba funsionáriu tama ba kategoria lista reforma obrigatória ne’e hamutuk 1.985. Ita selu hahú husi Janeiru to’o agora. Sei falta reformadu 70 ne’ebé seidauk kompleta dokumentu. Tanba ne’e hakarak husu reformadu atu kompletadadus,” Prezidente INSS dehan.
Bobo dehan iha pagamentu faze dahuluk ho reformadu hamutuk 1.400. Fulan-Fevereiru aumenta 246. Iha Marsu nia laran reformadu 231 kompleta dadus entaun hela 70. Iha Abríl nain 49 mak kompleta tan.
“Sei halo pagamentu iha Maiu nia laran. Ita hein katak iha Maiu nia laran simu dokumentu ne’ebe seidauk kompleta atu bele prosesa ona,” nia dehan.
Bobo hatutan funsionáriu públiku hotu-hotu kona-ba dadus traballadór sira-ne’ebe maihusi Ministériu ne’ebe de’it ne’e, dadus hosi Komisaun Funsaun Públika (KFP), Seguransa Sosiál simu jerál de’it. Maibé, atu dehan de’it katak maioria husi sira-ne’ebe mak reforma ne’e hosi Ministériu Edukasaun no Ministériu Saúde, seluk uitoan de’it.
Enkuantu, orsamentu ba reforma obrigatória ne’e nia osan kuaze rihun $807.
Realiza pagamentu ida-ne’e bazeia ba proposta-lei ne’e nia objetu konsedida ba Governu hodi lejizla kona-ba kauza hakotu ka hapara relasaun serbisu iha administrasaun públika prevista iha artigu 116 iha Lei Númeru 8/2004, 16 Juñu, neʼebé aprova Estatutu Funsaun Públika, altera husi Lei Númeru 5/2009, 15 Jullu.
Sentidu husi proposta-lei ne’e ho prezente lei autoriza Governu fiksa idade nu’udár kauza hapara ka hakotu relasaun administrasaun públika.
Ba proposta-lei ne’e iha artigu 3 (estensaun), intervensaun lejizlativa autoriza regula iha aspetu tuir mai; alterasaun kauza sesasaun ba relasaun serbisu iha administrasaun públika prevista iha artigu 116 iha Lei Númeru 8/2004, 16 Juñu, ne’ebé aprova Estatutu Funsaun Públika altera husi Lei Númeru 5/2009, 15 Jullu, adita limite idade hanesan kauza sesasaun relasaun serbisu.
Fisasaun limite idade aplikavel ba funsionáriu públiku no ajente administrativu abranje husi Lei Númeru 8/2004, 16 Juñu.
Aditamentu Lei Númeru 8/2004, 16 Juñu, norma ho objetivu konkretizasaun nesesária hodi fiksa limite idade hanesan kauza sesasaun relasaun serbisu iha administrasaun públika.
Jornalista: Osória Marques
Editór: Xisto Freitas da Piedade
