Komisaun C simu proposta Lei Taxa Administrativa husi Governu
DILI, 07 Maiu 2026 (TATOLI)-Komisaun C ne’ebé trata Asuntu Finansa Públika simu ona proposta lei númeru 29/VI (3a) kona-ba Rejime Jerál Taxa Administrativa husi Governu.
Prezidente Komisaun C, Cedelízia Faria dos Santos, hateten komisaun tau ona ajenda iha semana oin hahú halo audiénsia públika ho Ministru Koordenadór Asuntu Ekonómiku, Ministériu Petróleu no Rekursu Minerál, Ministériu Saúde, Ministériu Obra Públika, Ministériu Justisa ho entidade seluk ba inisiativa lejizlativa ne’e.
Deputada ne’e hateten katak rejime ne’e importante tebes no ba oin iha lei espesífika atu regula taxa abranje ba área barak, hanesan turizmu, munisípiu sira, no saúde iha serbisu espesífiku balun.
“Implikasaun lei ne’e, hanoin tinan 20-resin ita restaura independénsia, tenke tau ona sasán sira ne’e iha fatin para aumenta mós reseita ba Governu rasik. Tanba dalabarak preokupa reseita doméstika Timór nian atu kobre de’it saláriu no vensimentu mós la to’o”, nia hateten.
Lei ida-ne’e, tuir nia, la tama ba impostu tanba iha lei ketak no taxa administrativa ne’e refere ba serbisu sira ne’ebé fó husi administrasaun públika, nune’e sei halo diskusaun kle’an ba inisiativa lejizlativa ne’e.
Deputada ne’e dehan, durante ne’e, iha implementasaun taxa balun seidauk la’o másima maski lejizlasaun balun eziste hela.
“Governu nia sasán barak tau, hanesan ita-boot sira haree hela, ami bá muníspiu, edifísiu sira tau hela arrendamentu maibé balun la halo, maski lei iha, ita ladún tau kontrolu másimu”, nia salienta.
Tanba ne’e, ho lei foun ne’e mai atu mellora no abranje liután taxa iha área lubuk ne’ebé durante ne’e seidauk inklui. Ho meiu ida-ne’e Governu no apoiu husi Parlamentu atu haree lei ida-ne’e.
Jornalista: Nelson de Sousa
Editora: Maria Auxiliadora
