VIKEKE, 15 Maiu 2026 (TATOLI)—Xefe Suku Builó, Postu Ossú, Munisípiu Vikeke, Hélio Ximenes de Fernandes, informa Ministériu Agrikultura, Peska, Pekuária no Floresta (MAPPF) fasilita ona grupu agrikultór husi Suku Builó ke’e kolam hamutuk unidade 57, atu haki’ak ikan nila.
“Foin lalais ne’e ekipamentu pezadu husi MAPPF apoia ekavatór ba ami-nia Suku Builó hodi ke’e kolam hamutuk 57. Kada medida kolam lahanesan, balun 4×4, balun 7×6. Ekipa MAPPF husi diresaun peska halo levantamentu ba kolam sira-ne’e sei tau ikan oan nila hamutuk rihun-sia resin”, Hélio Ximenes de Fernandes ba TATOLI iha Postu Ossú, Sesta ne’e.
Nia dehan, MAPPF distribui uluk ikan oan tipu nila hamutuk rihun 3.000.00 mak tau uluk ona no bá-oin sei aumenta tan ikan oan tanba ikan oan seidauk to’o.
“Ita-nia grupu agrikultór hamutuk grupu 11 mak atu haki’ak ikan, atu hadi’a ekonómia família uma lara. Ne’ebé, kada grupu ema na’in lima bá leten,” Hélio akresenta.
Nia dehan programa haki’ak ikan ne’e Embaixada Nova Zelándia hamutuk ho CRS (Catholic Relief Services) mai vizita direta ona grupu haki’ik ikan iha Suku Builó.
“Programa ne’e Embaixadór husi Nova Zelándia no CRS mai direta haree ona, atu servisu hamutuk ho ita-nia grupu sira. CRS sei oferese mós formasaun ba grupu sira atu prodús hahán alternativu ikan nian ba ita-nia grupu sira,” nia haktuir.
Jornalista: Vitorino Lopes da Costa
Editór: Xisto Freitas da Piedade
