VIKEKE, 12 Maiu VIKEKE (TATOLI)—Xefe Suku Laline, Postu Administrativu Lakluta, Munisípiu Vikeke, Zaquiel dos Reis de Carvalho informa, tinan 2026, Suku Laline nia programa prioridade konstrui morru protesaun ba Aldeia Mauaman tanba rai-halai (errosaun) afeta ba uma-kain 56.
“Ami-nia programa prioridade ba tinan ida-ne’e atu konstrui morru protesaun ka bronjon ba Aldeia Mauaman tanba aldeia ne’e afetadu ba rai-halai no sei impaktu ba komunidade nia uma, tan ne’e mak ami tau bronjon,” Zaquiel dos Reis TATOLI iha Postu Lakluta, Tersa ne’e.
Autoridade suku Laline ne’e aprezenta, morru protesaun ne’ebé sei halo iha Aldeia Mauaman ne’e nian naruk purvolta metru 100.
“Orsametu ba morru protesaun ne’e mai husi Programa Dezenvolvimentu Nasionál Suku (PNDS) ne’ebé aloka ba ami-nia suku hodi implementa morru protesaun ne’e hamutuk rihun $40-resin,” nia tenik.
Aleinde ne’e, nia subliña, tinan ida-ne’e sei reabilita sede Suku Laline ne’ebé ho medida metru 6×12, ho orsamentu $12.000,00.
Tuir dadus, Suku Laline iha aldeia lima (5) kompostu husi Aimeti-Hun, Fatu-Kedo, Mau-Ama, Mikradek no Santu António, ne‘ebe ho total populasaun liu ema na’in-943.
Jornalista: Vitorino Lopes da Costa
Editóra: Xisto Freitas da Piedade
