VIKEKE, 15 Maiu 2026 (TATOLI)—Xefe Suku Uma Tolu, Postu Administrativu Lakluta, Munisípiu Vikeke, Eduardo Soares, informa akontesimentu udan boot iha tempu ida-ne’e fó impaktu ba ponte Sumaku kotu totál hodi difikulta movimentasaun ema no transporte sira labele ultrapasa.
“Ami hakarak relata katak daudaun ne’e ponte Sumaku kotu totál, kauza husi udan. Ponte ne’e halo ema labele hakat liu bá ponte sorin. Uluk kotu ami kado ai tau iha ponte leten hodi fasilita ita-nia movimentu sira, maibé akontesimentu udan ho intensidade boot ida-ne’e lori hotu ai kabelak sira-ne’ebé ami tau iha ponte leten. Tan ne’e mak komunidade labele ultrasa mota,” Eduardo ba TATOLI iha Postu Vikeke Vila, Sesta ne’e.
Nia hatutan ponte Sumaku ne’ebé kotu halo estudante ensinu báziku filiál husi aldeia rua hanesan Aldeia Ai-Sukunuk no Aldeia Fahi-Lai kuaze semana rua labele asesu eskola inklui funsionáriu suku sira.
Tanba ne’e, nia solisita Ministériu Obra Públika (MOP) atu tau-atensaun ba ponte Sumaku aselera kontrusaun ponte ne’e hodi fasilita ema halo movimentasaun tanba ponte ne’e kada tinan sempre difikulta povu Lakluta.
Ponte Sumaku lokaliza iha Suku Uma-Tolu, Postu Lakluta, nu’udár ponte úniku, laiha dalan alternativu seluk hodi fasilita movimentasaun sira no ponte referidu hahú kotu iha tinan 2019.
Hatán ba preokupasaun ne’e, Koordenadór MOP Munisípiu Vikeke, Mário Ângelo Menezes haktuir, kona-ba ponte Sumaku MOP rekoñese situasaun atuál difikulta populasaun nia movimentu.
“Ohin ha’u tenta koordena ho nasionál liuhusi Koordenadór Jerál Unidade Inspesaun, Verifikasaun no Pagamentu (UIVP) iha MOP. Ita husu kona-ba prosesu ponte Sumaku nian. Nune’e, fó resposta ba ha’u katak prosesu ponte Sumaku ne’e hetan ona aprovasaun iha Konsellu Administrasaun Fundu Infraestrutura (KAFI). Agora fila ona bá MOP hodi prosesa ba aprozionamentu. Tan ne’e, ita espera tempu besik iha ona rezultadu hodi implementa obra Sumaku,” nia tenik.
Jornalista: Vitorino Lopes da Costa
Editór: Xisto Freitas da Piedade
