DILI, 12 Maiu 2026 (TATOLI)—Ministra Saúde, Elia dos Reis Amaral, konsidera loron mundial enfermeiru no parteira sira sai save importante iha setor saúde iha Timor-Leste.
Notísia Relevante: Parlamentu konsidera enfermeiru sira nu’udar eroi verdadeiru ba salva ema nia vida
“Los duni ohin loron mundiál ba enfermeiru no mós iha loron0 5 fulan-Maiu ne’e loron mundiál parteira sira hotu iha mundu, maibé iha Timor-Leste ha’u konsidera parteira ho enfermeiru mak sai xave importante iha setór saúde iha Timor-Leste. Ho komemorasaun ne’e husu atu kontinua hatudu prestasaun servisu ne’ebé mak di’ak hodi halo atendimentu ba komunidade iha ita-nia rain,” Elia dos Reis hateten ba jornalista sira iha HNV, Bidau, ohin.
Nia hateten, ho komemorasaun loron internasionál parteira no enfermeiru mak husu ba profisionál saúde liuliu parteira no infermeiru atu hatudu nafatin kompromisiu no kompaixaun ba servisu atu bele hatudu prestasaun servisu ne’ebé mak di’ak.
“Komemorasaun internasionál parteira no enfermeiru husu nafatin ita hotu-hotu no exelente iha servisu no kompromisiu ho kompaixaun. Liuhusi kompaixaun mak xave ba buat hotu-hotu, tanba ita halo atendimentu ho domin no pasénsia ne’ebé mak ita iha, ita bele halo prestasaun servisu ho kuidadu moras sira ho di’ak, atu nune’e pasiente sira-ne’ebé mak mai hetan alta ho di’ak no kontente ho família sira,” nia dehan.
Iha fatin hanesan, Diretór Ezekutivu Hospitál Nasionál Guido Valadares, Nuno Vital Soares informa ohin Hospoitál Nasionál Guido no Ministériu Saúde ho parseiru hamutuk iha fatin ida hein selebra loron internasionál parteira no enfermeiru sira iha Timor-Leste tanba kontinua fó apelu ba profisionál saúde sira atu servisu ho fuan tuir kompromissiu ne’ebé mak sira simu.
“Apelu nafatin ba profisionál saúde sira-ne’ebé ohin selebra loron enfermeiru no parteira iha área enfarmajen nian husu nafatin ba sira servisu ho fuan ho domin tuir kompeténsia ne’ebé mak sira simu bainhira halo juramentu hodi halo servisu saúde nian,” Nuno Vital Soares hateten.
Nia dehan, nafatin fó asistensia saúde ne’ebé mak di’ak no profisionál liu tan ba pasiente sira, ida-ne’e mak husu ba profisionál saúde atu bele tau atensaun.
“Totál parteira iha ospitál nasionál kuaze 400-resin ho enfermeiru hamutuk 700, ne’ebé mak iha HNGV,” nia dehan.
Prezidente Asosiasaun Enfermeiru Timor-Leste, Domingos Soares, informa bazeia ba tema internasionál ba loron mudiál enfermeiru dehan katak “Ita-nia infermeiru, Ita-nia futuru no empodera enfermeiru mak salva vida”, signifika katak ho mensajen ne’ebé mak fó mai enfermeiru Timor-Leste nian.
” Asosiasaun enfermeiru Timor-Leste ho ita-nia enfermeiru sira nafatin halo atendimentu ho fuan no domin no fó tratamentu saúde ne’ebé mak ho Igualidade, onestidade no mós profisionálizmu nomós ita-nia pasiénsia. Tanba, enfermeiru ne’e sai hanesan fatór determinante ida mós atu kombate moras ba pasiente ida-nia isin,” nia hateten.
Nia husu mós ba enfermeiru sira atu labele para iha ne’e, maibé kontinua nafatin kapasita sira-nia matenek atu bele holo atendimentu ne’ebé mak di’ak no profisionálizmu nomós tuir regra ne’ebé mak iha.
Entretantu, komemorasaun ba loron internaisonál parteira no enfermeiru ne’e Hospitál Nasionál Guido Valadares (HNGV) hahú halo abertura ho misa no reativa sira-nia kompromisiu nu’udar profisionál saúde.
Jornalista : Felicidade Ximenes
Editór : Cancio Ximenes
