DILI, 12 Maiu 2026 (TATOLI) – Mundu inklui Timor-Leste komemora ohin, 12 Maiu, Loron Internasionál Enfermeiru nian. Iha okaziaun ne’e, Parlamentu Nasionál felisita enfermeiru sira hotu iha territóriu ne’ebé dezempeña knaar importante iha setór saúde hodi serbí povu.
Deputadu husi Partidu Demokrátiku (PD), Sancha Tilman, fó apresiasaun ba enfermeiru profisionál iha Timor-Leste, ne’ebé konsidera nu’udar funu-na’in ne’ebé hala’o knaar iha instalasaun saúde sira iha kapitál to’o área rurál.
Nia dehan maski hala’o knaar iha suku izoladu ka iha área estremamente remota no laiha eletrisidade, kondisaun estrada aat, maibé ho pasiénsia no dedikasaun kontinua halo funsaun hodi lori saúde ba sidadaun sira.
Tuir nia, enfermeiru sira iha papél importante ba promosaun saúde, prevensaun moras no fó kuidadu saúde primária ba komunidade. Sira fornese kuidadu iha situasaun emerjénsia no sei sai hanesan xave atu atinje kobertura saúde universál.
“Tanba ne’e, nu’udar reprezentante povu hakarak solisita ba Governu atu fó tratamentu dignu ho ekipamentu sufisiente no formasaun kontínua [ba enfermeiru sira]”, Sancha Tilman hato’o liuhusi intervensaun iha reuniaun Plenária Parlamentu Nasionál, ohin.
Loron Internasionál Enfermeiru iha tinan ne’e ho lema “Enfermeiru sira ne’ebé hetan empoderamentu salva moris” ka Empowered Nurses Save Lives. Ida-ne’e mak lema ne’ebé International Council of Nurses (ICN) hili atu komemora data ne’e.
Liuhusi lema ida-ne’e, ICN hakarak hato’o mensajen katak importante tebes atu fó empoderamentu ba enfermeiru sira, liuhusi promosaun ambiente servisu ne’ebé seguru no justu, no mós fó oportunidade atu sira bele hala’o sira-nia profisaun ho liberdade, influénsia no lideransa.
Tema ida-ne’e mosu iha momentu krítiku ida ne’ebé saúde globál enfrenta dezafiu boot sira, hanesan falta profisionál saúde, nesesidade atendimentu saúde ne’ebé aumenta, no mós impaktu konflitu no mudansa klimátika.
Jornalista: Nelson de Sousa
Editora: Maria Auxiliadora
