DILI, 15 Maiu 2026 (TATOLI)-Prezidente Repúblika, José Ramos-Horta, lidera reuniaun Konsellu Estadu ne’ebé halibur líder nasionál sira hodi diskute kona-ba interese nasaun nian.
Asesór ba Relasaun Públika no Komunikasaun Prezidénsia Repúblika no Portavós Reuniaun Konsellu Estadu, João Maria Aparício Guterres, hateten enkontru ne’e partisipa husi eis-Xefe Estadu sira mak hanesan Taur Matan Ruak, Francisco Guterres Lú Olo, no Xanana Gusmão, atual Primeiru-Ministru.
Iha mós partisipasaun husi Prezidente Parlamentu Nasionál, Maria Fernanda Lay, Madre Guilhermina Marçal, Maria Domingas Fernandes Alves, Milena Pires, Lere Anan Timur, Abílio Araújo, Virgílio Smith no seluk tan.
Xefe Estadu konvoka membru sira hotu inklui prezensa Governadór Banku Sentrál Timor-Leste, Hélder Lopes, ne’ebé ho sira-nia partisipasaun ne’e halo análize kle’an kona-ba aspetu ekonomia globál ne’ebé nia impaktu ba ekonomia rai-laran.
“Haksolok boot tanba ita-nia líder istóriku sira tuur hamutuk hodi ko’alia kona-ba interese nasionál nian”, João Maria Aparício Guterres hateten iha konferénsia imprensa ne’ebé hala’o iha Palásiu Prezidensiál, Bairu Pité, Dili, ohin.
Nia dehan sorumutu ne’e esesionál, signifika katak reuniaun Konsellu Estadu ne’e la’ós tuir de’it buat ne’ebé estabelese iha artigu Konstituisaun Repúblika nian, maibé Prezidente hateten katak importante tebes bolu membru hothotu Konsellu Estadu nian atu diskute kona-ba situasaun rai-laran nian.
“Ida-ne’e mak ohin sira ko’alia. Ha’u labele fó sai konteúdu, ne’e duni la permite atu fó sai konteúdu reuniaun nomós kona-ba deliberasaun ne’ebé foti iha Konsellu Estadu”, nia konklui.
Jornalista: Arminda Fonseca
Editora: Maria Auxiliadora
