DILI, 16 Maiu 2026 (TATOLI)–Koordenadór Korpu Isar Bandeira Nasionál (CIB, sigla portugés), Aurendino Afonso dos Santos, hateten, ekipa CIBN no Parada militár hahú ohin halo treinu konjunta durante loron-tolu, iha Tasi-Tolu.
Koordenadór dehan, Ekipa CIBN sei deskansa iha 19 Maiu hodi prepara ba simu Loron Restaurasaun Independénsia ba dala-24 iha 20 Maiu ho tema “Hamutuk ita harii pátria ida-ne’ebé justu, inkluzivu no reziliénte liután”.
“Kona-ba treinamentu Korpu Isar Bandeira Nasionál husi Institutu Forsa Defeza Timor-Leste ho Institutu Polísia Nasionál Timor-Lorosa’e, ne’ebé hahú husi 01 Maiu to’o ohin loron (01-16/05/2026), ita atinje 75%. Ohin ita treinu konjunta atu ajusta aliñamentu ba iha parada no ba ita-nia estudante Korpu Isar Bandeira Nasionál,” Koordenadór CIBN informa ba Ajénsia TATOLI iha Tasi-Tolu, Sábadu ne’e.
Koordenadór relata, durante treinu, observasaun ein jerál ba Korpu Isar Bandeira Nasionál nia saúde di’ak, forsa, mentál di’ak, ne’e tanba durante ne’e ekipa Servisu Nasionál Ambulánsia no Emerjénsia Médika (SNAEM) akompaña sira.
Kona-ba sira-nia estudu, parte relevante koordena ho responsável eskola hodi lisensa durante loron-20 ba preparasaun serimónia Restaurasaun Independénsia iha Tasi-Tolu.
“Tuir 35/2025, haktuir katak kada Korpu CIBN sei hetan insentivu ba kada ema $120. Ida-ne’e Governu atribui kada loron 20 Maiu no 28 Novembru. Tanba Dekretu Governu ne’e aprova hosi Konsellu Ministru,” nia tenik.
Notísia relevante : MAE konfirma Selebrasaun 20 Maiu hala’o iha Tasi-Tolu
Atuál Xefe Departamentu Planeamentu iha Diresaun Nasionál Planeamentu no Avaliasaun, Ministériu Administrasaun Estatál (MAE) ne’e hatutan, estudante selesionadu ba serimónia 20 Maiu 2026 hamutuk 75, ne’ebé kompostu husi mane 37 no feto 38, inklui ema ho nesesidade espesiál feto no mane ida.
Ekipa Korpu Isar Bandeira ba parte dadeer nian hamutuk na’in-lima hanesan Aime L. X. dos Reus (Voz Komandu) husi Eskola Sekundária São Miguel, Givio da silva dos Santos (kesi Bandeira) husi Eskola São Miguel, Febiano X. Soares Santos (Dada tali Bandeira) husi Eskola Sekundária São Paulo, Cerrela S. M. Hornay Scran (Escolto Corpo) Eskola Amigo de Jesus no Jesuintra C. Gama Ximenes (Simu Bandeira) Eskola Sekundária 12 Novembru.
Enkuantu, ekipa parte lorokraik nian mak Adelina Soares D. Marques (Entrega Bandeira) husi Eskola Sekundária São João Paulo, Lucia Araújo S. Gouveia Leite (Escolta Corpo) husi Eskola Sekundária 4 Setembru UNAMET Balide, Samuel da Costa Xavier (Voz Comando) husi Eskola Sekundária Kristal, Fidel Zagalo Espirito Santo (kore Bandeira) husi Eskola Sekundária São João Paulo no Noel 5. da Silva Guterres (Assegura tali Bandeira) husi Eskola Sekundária Jerál.
Estudante hosi Eskola Sekundária 13 mak hanesan Eskola Sekundária Amigo de jesus, Sagradu Coração de jesus, São João Paulo II, São Miguel Arcanjo, São Pedro, Externatu São José, Eskola Sekundária Nicolau Lobato, Eskola Sekundária Kristal, Eskola Sekundária AN-NUR, Eskola Sekundária Públiku 04 Setembru UNAMET Balide, 10 Dezembru, 12 Novembru no 5 de Maio.
Enkuantu, tuir observasaun ne’ebé Jornalista Ajénsia TATOLI iha terrenu, nota katak Komisaun Organizadora entusiazmu halo preparasaun, liuliu monta tenda ba bainaka VIP sira, inklui ba partisipante, estudante no komunidade ein jerál.
Jornalista : Osória Marques
Editora : Julia Chatarina
