DILI, 05 Maiu (TATOLI)—Ministru Administrasaun Estatál (MAE), Tomas Cabral, konfirma katak selebrasaun loron Restaurasaun Independénsia Repúblika Demokrátiku Timor-Leste (RDTL) 20 de Maiu ba da-24 sei hala’o iha Tasi-Tolu, Dili.
”Atividade sira sei hahú iha loron 17 to’o 20 Maiu, atividade hotu sei hala’o iha Tasi-Tolu. Serimónia hasa’e bandeira iha Tasi-Tolu, abertura konsertu múzika sira-ne’e iha loron 17 Maiu no sei ensera iha 20 Maiu,” Ministru Tomas Cabral hateten ba jornalista sira hafoin halo enkotru ho Prezidente Repúblika José Ramos-Horta iha Palásiu Prezidensiál Nicolau LObato, Bairru Pite tersa ne’e.
Nia dehan, selebrasaun ne’e sei partisipa husi bainaka importante sira husi nasaun Austrália, Indonézia no Portugál.
”Iha konfirmaasaun bainaka balun sei mai husi Indonézia, Austrália no Portugal. Maibe Ita hein sira-nia kofirmasaun ne’e bainhira. Husi Australia mak sira konfirmadu sei mai iha loron 18 to’o 21. Husi Indonézia mak sei mai eis-Ministru Negósiu Estrajeiru na’in-rua (2), mai Iha loron 18 to’o 20. Husi Portugál mak seidauk iha kofimasaun, maibé ministru defeza mak sei mai, maibé ita ho situasaun Ida-ne’ebé seidauk kofirmadu,” nia dehan.
Aleinde ne’e, selebrasaun ne’e mós sei simu bainaka sira seluk ne’ebé mai husi setór privadu (kompañia) no antigu-membru Governu sira husi rai-li’ur.
Objetivu prinsipál husi selebrasaun iha kapitál Dili nia ninin, tanba bele iha kontrolu ho di’ak, seguransa la’o kontroladu no komunidade bele partisipa ho hakmatek no parte seguransa bele jere veíkulu sira ho di’ak.
Tema ba komemorasaun Loron Restaurasaun Independénsia Timor-Leste nian ba da-24, iha 20 Maiu 2026, mak “Hamutuk ita sei Harii Pátria ne’ebé justa, inkluziva no reziliente liután”. Tema ne’e aprova husi Konsellu Ministru bazeia ba proposta husi Ministru Administrasaun Estatál, Tomás do Rosário Cabral.
Tema “Hamutuk ita sei Harii Pátria ne’ebé justa, inkluziva no reziliente liután” ne’e ninia signifikadu mak foka ba unidade nasionál atu harii nasaun ne’ebé ho kbiit no justisa sosiál, seguru no bele hasoru dezafiu sira, no eventu ne’edar selebrasaun ofisiál ne’ebé sei organiza husi Governu ba da-24 restaurasaun soberania.
Tema ne’e, refleta kompromisu Governu Konstitusionál da-sia (IX) nian atu fortifika unidade nasionál no dezenvolvimentu sustentável iha Timor-Leste.
Jornalista : Hortêncio Sanchez
Editór : Cancio Ximenes
