VIKEKE, 18 Maiu 2026 (TATOLI)—Autoridade Protesaun Sivíl (APC-sigla portugeza) no Servisu Ministériu Solidaridade Sosiál no Inkluzaun (MSSI) apoia ona pakote ai-han emerjénsia ba vítima afetada inundasaun iha Aldeia Uma-Boot, Suku Luka, Postu Administrativu Vikeke Vila, Munisípiu Vikeke.
Tuir delegadu Uma-Boot, Aldeia Uma-Boot, Mariano Mendonça, família afetada inundasaun husi Aldeia Uma-Boot hetan ona apoia pakote ai-han emerjénsia husi parte APC no MSSI ba família vítima sira hodi auguenta sira-nia moris iha situasaun udan nian laran.
“Kona-ba ita-nia família afetada inundasaun husi mota Uelolo foin lalais ne’e, horibainrua (Sábadu), ita-nia parte relevante sira husi APC no MSSI oferese ona ai-han, lona no sana ba ita-nia vítima sira hodi aguenta sira-nia moris. Maski ita haree ai-han ne’ebé apoia ba vítima sira uitoan, maibé ita agradese tanba tulun ona ita-nia komunidade,” Mariano Mendonça ba TATOLI iha Postu Vikeke Vila, Segunda ne’e.
Nia relata, apoia ai-han emerjénsia husi MSSI kompostu husi foos, lona, sana, biti no husi parte APC kompostu husi foos, mina sona, dose, sardina, supermie, masin-midar, kafé, susu-been, sana, tasu inklui lona.
“Situasaun inundasaun atuál iha Aldeia Uma-Boot daudaun ne’e mota normál fali ona, nune’e horisehik Domingu ne’e ita-nia família afetada sira iha sentru evakuasaun fila ona bá idaidak nia uma,” nia relata.
Mariano informa mota agora tun nafatin, maibé komesa menus ona ne’ebé uma balun bee komesa maran ona.
“Maski komunidade nia uma bee menus ona, maibé edifísiu eskola EBC Uelolo daudaun ne’e bee nafatin nakonu, tan ne’e ita-nia estudante sira labele asesu eskola,” nia subliña.
Daudaun ne’e, nia tenik, estudante sira husi EBC Uelolo sei kontinua tuir prosesu aprendizajen iha sentru evakuasaun Uma-Boot.
Iha parte seluk, Xefe Departamentu Jestaun Risku Dezastre Naturál husi APC Munisípiu Vikeke, Eugénio Guterres hateten, kona-ba apoia emerjénsia parte APC distribui ona ba vítima afetada inundasaun iha Aldeia Uma-Boot.
“Ami apoia ona ai-han emerjénsia ba ita-nia vítima sira, no mós ita-nia parseiru Care International apoia fugaun, kulsaun uza anin, lipa no seluk tan ba ita-nia vítima sira,” nia akresenta.
Jornalista: Vitorino Lopes da Costa
Editór: Xisto Freitas da Piedade
