VIKEKE, 03 Juñu 2026 (TATOLI)—Reprezentante funsionáriu Kadastrál Munisípiu Vikeke, Pedro Guterres, informa daudaun ne’e servisu Terra no Propriedade Munisípiu Vikeke enfrenta difikuldade ba kombustivel transporte nune’e difikulta funisionáriu sira tun rejista proprietária Estadu iha postu sira no mós hasoru difikuldade ba komputadór.
“Ami iha-ne’e transporte (karreta) ida no motorizada, maibé laiha kombustivel ba tranposte sira-ne’e hodi fasilita funsionáriu sira hala’o servisu ba rejista uma Estadu sira-ne’ebé lokaliza iha Postu Ossú, Uatulari, Uatukarbau no Uatulari. Iha Postu Vikeke Vila ne’e funsionária la’o de’it mak bá halo rejista proprietária Estadu sira,” Pedro Guterres ba jornalista sira iha Postu Vikeke Vila, Kuarta ne’e.
Aleinde ne’e, nia haktuir, problema seluk ne’ebé sira enfrenta mak menus komputadór, funsionáriu na’in-lima uza lisuk komputadór ida, iha-ne’ebé tuir loloos ne’e funisionáriu ida uza komputadór ida tanba funsionáriu sira-nia kna’ar diferente.
Pedro informa problema sira-ne’e aprezenta ona ba Vise Ministru Justiza no Vise Ministru ne’e mós mai haree direta ona problema sira-ne’e, maibé to’o agora seidauk rezolve.
Hatán ba preokupasaun ne’e, Diretór Servisu Terra no Propriendade Munisípiu Vikeke, Apolinário Ximenes, rekoñese durante ne’e sira enfrenta liubá kombustivel, mobiliáriu no ekipamentu liuliu komputadór sira mak menus tebes.
“Problema hirak-ne’e ha’u hato’o ona ba ministériu relevante maibé to’o agora seidauk rezolve, ne’ebé ita tenke pasiénsia hodi hein. Tanba problema sira-ne’e kuaze minisípiu hotu enfrenta,” nia tenik.
Entretantu, funsionáriu ativu Servisu Terra no Propriedade Munisípiu Vikeke nian totál hamutuk na’in-17.
Jornalista: Vitorino Lopes da Costa
Editór: Xisto Freitas da Piedade
