BAUKAU, 25 Maiu 2026 (TATOLI)—Konsellu Munisipál Kombatente Libertasaun Nasionál (CMCLN-sigla portugés) Baukau submete ona lista kandidatura bolsa oportunidade hamutuk na’in-294 ba Ministériu Kombatente Libertasaun Nasionál (MCLN-sigla portugeza).
Sekretáriu Jerál CMCLN Baukau, Roberto Carlos da Costa ‘Laran Taridu’, esplika prosesu simu dokumentus no rejistrasaun ba períodu tinan-ne’e ramata ona iha finde Abríl nune’e envia ba nasionál hodi halo selesaun antes anúnsia iha fulan-Outubru.
“CMCLN Baukau simu no halo rejistu de’it. Desizaun iha nasionál,” Laran Taridu informa ba TATOLI iha ninia kna’ar fatin, Vila Antiga, Segunda ne’e.
Nia relata CMCLN Baukau rekolla totál kandidatura 294 bazeia ba rekizitu ne’ebé Ministériu fó-sai hanesan estudante ne’ebé valór di’ak hahú husi ensinu báziku, sekundáriu no ensinu superiór ne’ebé kada tinan Baukau hetan apoia hamutuk na’in-100.
Notisia relevante: CMCLN Baukau hahú rejista kandidatu bolsa estudu
Aleinde ne’e, komisaun mós fó oportunidade ba oan veneranu sira bazeia ba rezultadu valór iha eskola kompostu na’in-50 husi ensinu superiór hanesan rai-laran 45 no rai-li’ur na’in-lima ne’ebé kada tinan apoia orsamentu hamutuk $1.000, enkuntu na’in-50 seluk apoia ba estudante ensinu báziku no sekundáriu ho valór orsamentu $100.
Entretantu, CMCLN Baukau rekomenda ba CMCLN atu aumenta durasaun tempu relasiona apoia bolsa oportunidade ba estudante nune’e kada tinan labele iha renovasaun no aumenta benefisiáriu tanba maioria estudante sira husi Baukau iha valór aas maibe kouta limitadu.
Jornalista: Natalino Belo
Editór: Xisto Freitas da Piedade
