BAUKAU, 03 Maiu 2026 (TATOLI)—Kompañia mineiru Estrela Resources apoiu reabilitasaun fasilidade bee-moos ba Komunidade Suku Ueru-mata, Postu Administrativu Laga, Munisípiu Baukau.
Diretór Dezenvolvimentu Bisnis Kompañia Estrela Resources, Chris Downs, esplika projetu bee-mos ne’e nu’udár kompromisu kompaña Estrela Resources nian bainhira hahú hala’o atividade esprolasaun mineiru karkáriu iha Ueru-mata iha-ne’ebé sai preokupasaun komunidade durante tinan naruk.
“Ida-ne’e nu’udár mehi komunidade na’in ne’ebé kompañia kontribui ba komunidade iha Ueru-mata,” CEO Estrela Resources hateten iha Ueru-mata, Kuarta ne’e.
Nia relata proposta kanalizasaun bee-moos hato’o husi komunidade iha tinan-2025 no ho kooperasaun mútua ohin rezolve ona problema sosiál iha Ueru-mata no husu atu kuidadu nafatin nune’e bele benefísia komunidade jerál.
Iha fatin hanesan, Xefe Suku Ueru-mata, Sabino Martins, hato’o agradese ba Kompañia Estrela Resources ne’ebé apoia ona ba komunidade ne’ebé durante ne’e halerik ba bee-moos mezmu presiza aumenta tan torneira nune’e fasilita komunidade.
“Komunidade ninia halerik liuhusi Kompañia Estrela Resources responde ona,” Sabino Martins hateten.
Líder Ueru-mata relata, projetu referidu nu’udár kompromisu entre komunidade hamutuk ho Kompañia Estrela Resources bainhira hala’o atividade esprolasaun mineiru iha Ueru-mata.
Sabino Martins konsidera projetu bee-moos referidu implementa ho kualidade no nu’udár autoridade suku sei apela ba komunidade atu utiliza ho kuidadu no kontinua tau-atensaun nune’e sustentabilidade ba futuru.
“Ita hotu kontribui ba dezenvolvementu iha Ueru-mata tanba komunidade mak hetan benefísiu,” Sabino akresenta.
Aleinde ne’e, Diretór Ezekutivu ANM, David de Araújo, hateten Kompañia Estrela Resources hamutuk ho Murak Rai hetan lisensa husi ANM iha Marsu 2025 hodi halo esplorasaun ba matéria mineru fatuk karkáriu nune’e kanalizasaun bee-moos nu’udár kompromisu husi kompañia ne’ebé hanaran programa kontéudu lokál hanesan kria empregu no programa dezenvolvementu komunitáriu hanesan fasilita bee-mos ba komunidade.
“Ida-ne’e hanesan sira-nia programa serbisu no orsamentu ne’ebé mak aprovadu husi ANM períodu tinan 2026,” David Araújo hateten.
Entretantu, Projetu kanalizasaun bee-moos iha Ueru-mata utiliza bee-matan rua hanesan Abarisi no Ufuira ho tótal distánsia kilómetru 3,587 hamutuk tanke rezervatóriu rua hanesan tanke dahuluk volume litru rihun sanulu (10) no tanke rezervatóriu daruak hamutuk volume litru rihun 20, distribui ba torneira hamutuk 10 ba komunidade Suku Ueru-mata, aldeia Ueru-mata ho totál benefisiáriu hamutuk 821 husi uma-kain 217.
Projetu kanalizasaun bee-moos referida apoia husi kompañia mineiru Estrela Resources no responsavél husi Kompañia lokál Manudare, Unipessoal, Lda ho totál orsamentu $70.400 durasaun fulan-ida resin.
Jornalista: Natalino Belo
Editór: Xisto Freitas da Piedade
