VIKEKE, 25 Maiu 2026 (TATOLI)—Xefe Suku Ahik, Postu Lakluta, Munisípiu Vikeke, Ercílio Soares, informa, liña eletrisidade iha Suku Ahik avaria kuaze fulan lima ona.
“Ami-nia liña internet ne’e Governu instala hotu ona, maibé to’o agora ami seidauk utiliza tanba liña eletrisidade avaria kuaze fulan lima ona,” Ercílio Sioares ba TATOLI iha Postu Lakluta, Segunda ne’e.
Autoridade lokál ne’e hatutan eletrisidade liga bá Suku Ahik ne’e husi Munisípiu Manatutu, komesa la lakan iha fulan-Janeiru to’o agora seidauk lakan.
“Ami-nia liña eletrisidade husi Manatutu, la’ós husi Vikeke. Se husi Vikeke karik normaliza ona. Ha’u sente eletrisidade avaria ne’e difikulta mós ami hodi halo atendimentu ba ita-nia komunidade ne’ebé trata deklarasaun ruma husi suku. Ita-nia populasaun tenke mai postu mak print deklarasaun hafoin ami asina,” nia haktuir.
Tan ne’e, nia husu parte kompetente koordena ho Eletrisidade de Timor-Leste, Emepreza Públika (EDTL, E.P.) hodi orienta EDTL Manatutu hadi’a liña eletrisidade husi Manatutu, atu povu Ahik asesu eletrisidade.
“Kona-ba eletrisidade avaria ne’e ha’u informa ona ba EDTL Munisípiu Vikeke hodi kordena ho EDTL Manatutu para normaliza eletrisidade husi Manatutu, maibé to’o agora seidauk normaliza. Tan ne’e, ha’u husu bá nasionál orienta téknika sira halo normaliza eletrisidade mai Suku Ahik nian atu ami asesu,” nia hato’o.
Hatán ba preokupasaun ne’e, Koordenadór EDTL, E.P, Munisípiu Vikeke, Ernesto Sarmento, haktuir, kona-ba eletrisidade ba Suku Ahik ne’ebé daudaun ne’e avaria to’o agora parte EDTL seidauk halo identifikasaun tanba kondisaun estrada liga bá Suku Ahik grave hodi difikulta movimentasaun transporte.
“Tanba ne’e mak ita seidauk identifika loloos kauza ba eleteisidade la laka nian. Ami mós koordena ona ho EDTL Manatutu, maibé kondisaun estrada mak aat iha tempu udan ne’e. Nune’e, ba prosesu koordenasaun halo ho Manatutu hafoin udan ne’e para nune’e halo identifikasaun ba liña eletrisidade ba Suku Ahik nian,” nia tenik.
Entretantu, tuir dadus, abitante asesu ba ahi eletrisidade husi Suku Ahik hamutuk uma-kain 450.
Jornalista: Vitorino Lopes da Costa
Editór: Xisto Freitas da Piedade
