DILI, 10 Juñu 2026 (TATOLI)—Diretór Servisu Kompra iha INFPM, Sergio Belo, informa estoke ai-moruk iha Institutu Nasionál Farmásia Produtu no Médikamentu hamutuk 318 no husi ne’e estoke ne´ebé mak sufisiente hamutuk 269 ka 85% no stock out hamutuk 49 ka 15%.
“Estoke ai-moruk ne’ebé disponivel iha INFPM ne’e hamutuk 85% ne’ebé kompostu husi vital, nesesariu no esensiál sira entaun ita katégoria normál hela,” Sergio Belo ba Jornalista sira iha nia kna’ar fatin, Kampung Alor, ohin.
Nia relata, ho estoke ne’ebé mak daudaun ne’e iha sei katégoria normál hela, tanba Institutu Nasionál Farmásia Produtu Médikamentu ne’e hanesan fatin ida atu rai de’it, maibé bainhira ai-moruk sira-ne’e tenke halo distribuisaun ba armazen rejionál tolu ne’ebe mak iha hodi hatán ba nesesidade fasilidade saúde nian.
“INFPM hanesan fatin alvu ida ai-moruk ne’e tama tenke distribuisaun kedas armazen rejionál tolu ne’e hanesan Ainaru, Baukau no Maliana. Ne’ebé ko’alia kona-ba stock out ne’e bainhira rejionál tolu ne’e ho INFPM laiha ona mak ita kategoria ba stock out, mais durante ne’e ita halo maneza no muda sasán sira-ne’e maibé ita mós evita liu prazu,” nia dehan.
Tanba ne’e, durante komunikasaun entre armazen rejionál ho armazen sentrál ne’e tenke la’o di’ak atu ai-moruk ne’e labele tau de’it iha fatin ida, depois iha fatin seluk buka ai-moruk. Tuir ita-nia estoke ne’ebé mak iha, estoke normál banhira estoke balun iha problema sa’e liu ona 30% no 45% mak ita konsidera estoke problema, maibé pur momentu estoke ai-moruk di’ak hela.
Nia esplika, prosesu kompra ba tinan 2026 kontínua hela no sasán balun agora tama daudaun ona no bele tama to’o tinan ne’e ramata.
“Ai-moruk sei kontínua tama to’o Dezembru 2026 ramata, atu nune’e bele asegura ita-nia estoke iha armazen sentrál INFPM,” niadehan.
Jornalista : Felicidade Ximenes
Editór : Cancio Ximenes
