DILI, 05 Juñu 2026 (TATOLI)–Tribunál Judisiál Primeira Instánsia Dili (TJPID), Sesta ne’e, kontinua halo julgamentu ba kazu fornesimentu farda no manutensaun ró rua iha Unidade Polisia Máritima (UPM), iha tinan 2012.
Tribunál Koletivu tuir ajenda julgamentu ba kazu ne’e, rona depoimentu husi sasin Diretór empreza Linio Unipessoal Lda, António da Costa Martins.
Iha sala julgamentu, sasin konta tuir ba Tribunál katak, momentu ne’ebá iha tinan 2011 no 2012, empreza Lanio Unipessoal mak hetan fiar husi Governu hodi fornese farda no manutensaun ró rua UPM, maibé parte Komandu Polísia Nasionál Timor-Leste (PNTL) la halo reklamasaun bainhira empreza halo ona nia serbisu. Nune’e, empreza entrega ba Komandu atu uza.
Nia dehan, Lanio Unipessoal konkorre ba konkursu públiku ne’e no sasin rona direta husi Arguidu LM mak konkorre.
Sasin konta tan, prosesu submete dokumentu fornesimentu farda ba PNTL ne’e, lisensa no empreza nia profile ba iha Komandu UPM, hafoin desizaun husi PNTL nia aprovizionamentu mak aprova.
Notísia relevante : Antigu Komandante Jerál PNTL HdC iha koñesimentu ba fornesimentu farda ba membru UPM
Sasin deklara, sira asina kontratu iha Ministériu Interiór maibé nia la lembra ona kona-ba orsamentu.
“Momentu ne’ebé ami asina kontratu uluk ba fornesimentu farda no entrega iha Ministériu Interiór. Farde fornese tuir kontratu ne’ebé mak iha,” Sasin hato’o iha sala julgamentu.
Sasin dehan, depois ida-ne’e mak membru feto balun husi UPM reklama fali dehan farda ne’e medida to’o no sapatu laiha, tanba razaun farda no sapatu ne’e uza la’os iha rai-maran maibé iha tasi.
“Membru feto ida-ne’ebé halo reklamasaun ne’e ba pesoál, la’os reprezenta PNTL, katak farda ne’e sepatu laiha,” Sasin haktuir.
Sasin ne’e mos fó deklarasaun kona-ba manutensaun ró, katak nia rona informasaun husi Antigu Komandante UPM, Superintendente Lino Saldanha dehan UPM iha ró rua mak a’at.
Ho ida-ne’e mak sira fó ba sasin sira atu hadi’a, entaun sasin hetan despaisu tun hodi aprova no sasin sira hadi’a. Tanba ne’e, sasin sira hatama dokumentu ba Komandu UPM hodi hasa’e ba Komandu Jerál no ikus aprova iha Ministériu Interiór.
“Momentu ne’ebá konsege hadi’a duni ró ne’e no tékniku sira dehan ró ne’e paradu kleur ona, maibé konsege di’ak no entrega ba UPM,” nia katak.
Sasin dehan tan, momentu ne’ebá sira hadi’a ró ne’e mak ida jeladór ho item lubuk ida, sasán sira sosa foun hotu. “Teniku sira husi Indonézia hadi’a di’ak hotu, nune’e ekipa husi UPM no tékniku sira halo operasaun kedan bá-mai Ataúru”.
Tuir sasin, nia importa sasán sira ne’e tuir saida mak parte PNTL sira husu. Depois ida-ne’e, laiha ida mak halo reklamasaun ba empreza kona-ba kulidade farda no manutesaun ró. Nune’e, sasin hafodak bainhira PNTL lori kazu ne’e bá Tribunál.
Iha parte seluk, sasin Mario Quintão, haktuir, nia nu’udar responsável iha Finansas UPM nian iha tinan 2012, momentu ne’ebá hetan orientasaun husi Komandante UMP, Lino De Jesus kona-ba planu atu sosa farda. Nune’e, UPM prepara pedidu hodi submete ba Komandu Jerál.
Nia dehan, iha tempu ne’ebá tuir nia hatene parte Finansa UPM halo pedidu de’it no submete ba Komandu Jerál PNTL, enkuantu prosesu aprovizionamentu ne’e la’os iha UPM.
Mario Quintão hanesan mós benefisiáriu ba farda, nota farda ne’e modelu ladi’ak, nune’e sira informa kedan ba Komandu Jerál PNTL kona-ba situasaun ne’e.
Rona tiha deklarasaun husi sasin na’in-rua, Tribunál marka ba loron 10 Juñu iha oras 11:00 hodi kontinua ba alegasaun.
Akuzasaun
Iha akuzasaun, sita katak husi projetu adjudikasaun direita ne’ebé Governu liuhusi Sekretaria Estadu Seguransa fó ba empreza lokál fornese farda ba UPM laiha kualidade, nomós empreza laiha mekániku espesializadu hodi halo manutensaun ba ró rua iha PNTL. Tanba ne’e, ro’o rua ne’e kontinua avaria to’o agora. Nune’e, fó prejuizu ba Estadu ho montante globál $34.500.
Tanba ne’e, akuza arguidu sira ho krime partisipasaun enkonomia iha negósiu ne’ebé mak alega envolve husi Antigu Sekretáriu Estadu Seguransa no atuál Ministru Interiór, Fransisco da Costa Guterres, Antigu Komanda Jerál PNTL no Antigu Ministru Interiór, atuál Diretór Jerál Servisu Nasional Intelegensia (SNI), Longuinhos Monteiro, Antigu Komandante Jerál no Antigu Komandante Komandu Administrasaun PNTL, Henrique da Costa, Antigu Adjuntu Komandante Jerál no atuál Asesór Ministériu Interió,r Afonso de Jesus, Antigu Inspetora GIA ho inisial CRCS, inklui Antigu Diretór Aprovizionamentu husi Sekretaria Estadu Seguransa inisiál JC.
Audiénsia julgamentu ne’e prezide husi Juíz koletivu, Argentino Nunes Zulmira Auxiliadora no Ivan Suritai, Mínistériu Públiku reprezenta husi Prokuradór Rafael Gusmão, Arguidu sira hetan Asisténsia legál husi Defensór Públiku no Advogadu Privadu sira.
Jornalista : Natalino Costa
Editora : Julia Chatarina
