DILI, 23 Abríl 2026 (TATOLI)–Tribunál Judisiál Primeira Instánsia Dili (TJPID), Kinta ne’e, kontinua realiza julgamentu hodi rona depoimentu husi Antigu Komandante Jerál Polísia Nasionál Timor-Leste (PNTL) ho inisiál HdC, ba kazu fornesimentu fardamentu no manutensaun ba Ró NRTL Dili no NRTL Hera.
Arguidu HdC deklara ba Tribunál katak, akuzasaun ne’ebé mak Ministériu Públiku (MP) imputa ba nia ne’e balun loos no balun sala. Arguidu mós laiha koñesimentu kona-ba fornesimentu fardamentu no manutensaun Ró ba Unidade Polísia Marrítima (UPM) ho marka NRTL Dili no NRTL Hera.
Arguidu nu’udar Komandante iha Komandu Administrasaun PNTL iha tinan 2012 no nia serbisu administra no relata ba departamentu sira iha Komandu Administrasaun.
Komandante UPM hato’o pedidu urjente pur eskrita dirije ba Komandante Jerál iha tinan 2012 hodi sosa farda ba membru, ne’ebé pedidu ne’e Arguidu HdC hetan despaisu husi arguidu LM, ne’ebé iha despaisu husu atu aprova no prosesa ba Departamentu Finansa hodi prosesa, depois husi ne’ebá halo pedidu ida hodi manda ba Sekretáriu Estadu Seguransa.
Pedidu ne’e dehan presiza urjente atu utiliza farda ba treinamentu tanba iha membru Polísia sira husi rai-li’ur.
Iha momentu ne’ebá, karta husi Komadante UPM katak, atu utiliza orsamentu ba manutensaun PNTL nia viatura tanba iha finansa laiha osan atu fornese fardamentu ba membru sira.
Arguidu iha koñesimentu de’it mak Komandante aprova, prosesa no pedidu tama, dirije ba Komandante Jerál, tanba iha pedidu ne’e urjente no presiza tebes. Iha pedidu temi ona kompañia nia naran no iha kompañia naran Lanio Unipessoal Lda, sira mai ho kompañia tolu. Iha dokumentu ne’e iha kompañia Lanio Unipessoal Lda, maibé arguidu la koñese kompañia nia na’in.
Arguidu mós laiha koñesimentu kona-ba kompañia sira ne’ebé mak hatama ona sasán. Arguidu nia serbisu mak prosesa hodi enkamiña ba iha Sekrataria Estadu Seguransa.
Kona-ba Ró NRTL Dili no Ró NRTL Hera, pedidu adjudikasaun ketak-ketak, arguidu la hatene tanba sá mak arguidu la asina no asina fali husi Xefe Departamentu Finansa no kona-ba kazu ne’e arguidu la asina.
Notísia relevante : Antigu Komandante Jerál LM fó depoimentu iha Tribunál ba kazu partisipasaun ekonomia no administrasaun danoza
Prosesu sira ne’e iha hotu Sekretaria Estadu Seguransa nia aprovizionamentu, ne’ebé kazu sira hanesan ne’e foin mak ba dahuluk akontese iha Komandu UPM.
Arguidu mós deklara ba Tribunál katak momentu ne’ebá prosesu aprovizionamentu iha Komandu PNTL seidauk iha, entaun buat hotu momentu ne’ebá kona-ba aprovizionamentu sentraliza iha Sekretaria Estadu Seguransa.
Diresaun Aprovizionamentu Komandu PNTL nian ne’e Komandu Jerál PNTL foun estabelese iha tinan 2019.
Nia konfesa, Sekretáriu Estadu Seguransa halo adjudikasaun ba kompañia Lanio Unipesoal Lda ba fornesimentu farda ba UPM la envolve nia no nia laiha koñesimentu no la envolve nia iha reuniaun, tanba prosesu aprovizionamentu momentu ne’ebá Sekretáriu Estadu rasik mak haree.
Sasin GSdA laiha koñesimentu
Nune’e mós, sasin GSdA katak laiha koñesimentu ba fornesimentu fardamentu tanba iha momentu ne’e hetan telfone husi Komandante UPM, tanba ne’e ekipa sira hanesan Diretór Aprovizionamentu, Diresaun GUIA no Sekretáriun Estadu Seguransa mak ba.
Sasin deklara, tuir loloos sasán ne’e tama iha Sekretariu Jerál Seguransa Estadu maibé derrepente ba iha Komandante UPM sasán sira mak hanesan fardamentu. Iha momentu ne’e ekipa GUIA mak hatene.
Bainhira Komandante UPM simu ona sasán no invoice husi ajénsia, signifika katak sasán ne’e kualidade.
Sasin deklara, baibain kompañia sira hatama sasán tenke tau iha Sekretáriu Estadu Seguransa nia armazein. Ekipa sira ba bolu ajénsia sira haree no halo verifikasaun buat hotu loos ona no kualidade mak foin distribui ba sira, maibé iha Komandante Jerál UPM nia laiha. Razaun tanba sá mak hanesan ne’e sasin la hatene.
Sasin DMB deklara, iha momentu ne’ebá sasin nu’udar Diretora Administrasaun ne’e serbisu elabora Orsamentu Jerál Estadu ba Departamentu sira no responsável ba lojístiku no rekursu umanu.
Sasin laiha koñesimentu maibé sasin rona de’it mak fornesimentu fardamentu no manutensaun ba Ró NRTL Dili no Ró NRTL Hera tanba la envolve direita. Sasin simu de’it informasaun hosi lojíztika katak sasán sira ne’ebé mak kompañia hatama ne’e la tuir medida.
Kona-ba pedidu adjudikasaun direita ne’e sasin la envolve tanba prosesu sira ne’e husi RNAE. Durante prosesu la’o ne’e, sasin la hetan kontaktu husi ema ruma kona-ba aselera fornesimentu fardamentu ba prosesu sira.
Sasin AH deklara, iha tinan 2012 ne’e sasin hanesan Kapitaun Ró NRTL Dili, maibé sasin la iha koñesimentu ba fornesimentu fardamentu no Ró NRTL Dili.
Momentu ne’ebá kompañia Lanio Unipessoal Lda mak hadi’a Ró NRTL tanba sasin iha oin.
Sasán ne’ebé iha Ró NRTL atu halo manutensaun mak hanesan jeradór, troka panel box, fijivel jeradór nia. No tuir sasin nia haree katak sasin kumpre orden de’it no sira troka tiha, depois troka tiha laiha oportunidade ba ró tanba ro tuan no nia kapasidade labele ba dook.
Sasin informa, antes ne’e ró labele tanba jeradór la funsiona. Halo manutensaun ne’e mak sasin informa liuhusi verbál de’it ba Komandante UPM tanba Jeradór a’at labele halo operasaun.
Sasin deklara, molok halo manutensaun ró la funsiona, depois manutensaun nia funsiona fali, nia kontinua la’o problema tanba iha tinan2012 , 2013, to’o iha 2016, durante sasin nia mandatu hanesan Kapitão ne’e ré nafatin di’ak.
Sasin relata ba matebian Komadante UPM. Iha momentu ne’e tékniku iha UPM laiha. No sasin mós dehan, laiha inspensaun ruma hosi ekipa ba sira.
Hafoin rona tiha parte sira ne’e, Tribunál deside muda ba Kuarta (30/04) hodi kontinua rona sasin sira seluk
Audiénsia julgamentu ne’e prezide husi Juíz kolektiva Argentino Nunes, Zulmira Auxiliadora, Ivan Patrecenio, MP Titulár reprezenta Prokuradór, Rafael Gusmão no João Marquez no arguidu na’in-hitu hetan asisténsia legál husi Defensór Públiku no Advogadu Privadu nain-tolu.
Jornalista : Natalino Costa
Editora : Julia Chatarina
