VIKEKE, 10 Juñu 2026 (TATOLI)—Organizasaun Naun Governamentál Froum ONG Timor Leste (FONGTIL), Kuarta ne’e, oferese formasaun ba jornalista sira iha Munisípiu Vikeke kona-ba inkluzaun.
Iha abertura formasaun ne’e, Diretór Ezekutivu FONGTIL, Inocêncio de Jesus Xavier, haktuir FONGTIL servisu hamutuk ho parseiru Plan Internasional, Fundasaun CAUCUS no hetan fundu husi Uniaun Europeia hodi oferese formasaun ba rádiu komunidade, mídia sira no organizasaun sosiedade sivíl sira iha Munisípiu Vikeke.
“Nune’e, ohin ami mai fó formasaun ba mídia sira no ba ema sira-ne’ebé gosta halimar mídia sisiál sira hakarak halo transforma dezenvolvimentu ba sosiedade, oinsá gasta osan $1 kontribui buat di’ak ba ita-nia sosiedade. Tan ne’e, projetu ida-ne’e ami servisu hamutuk ho Plan no CAUCUS ne’ebé implementa iha Vikeke, Ainaru, Ermera, Dili no Ataúru,” Inocêncio de Jesus Xavier ba TATOLI, iha salaun São Francisco de Assis, Beloi, Kuarta ne’e.
Nia dehan, projetu referidu foku empoderamentu ba sosiedade sivíl liuliu ba advokasia baze mudansa ho evidénsia ka faktu sira.
“Ita labele promove informasaun hoax sira. Ita publika informasaun sira loloos ba ita-nia sosiedade. Tan ne’e, ita atu fó-sai informasaun ruma tenke ho evidénsia ne’ebé klaru, atu eduka ita-nia sosiedade ne’ebé loos,” nia hato’o.
Objetivu jerál formasaun atu haforsa abilidade no koñesimentu rádiu no mídia nian iha produsaun rádiu, téknika tranzmisaun no jornalizmu komunitáriu hodi hasa’e kualidade no impaktu mídia komunitária ba isu inkluzivu iha munisípiu.
Kona-ba matéria produsaun konten inkluzivu ne’ebé promove igualdade jéneru, justisa sosiál no partisipasaun sívika/espasu síviku.
Matéria sira-ne’ebé oferese mak hanesan promove igualdade jéneru fasilita husi Fundasaun CAUCUS, justisa sosiál fasilita husi FONGTIL, partisipasaun sívika/espasu síviku fasilita husi Plan International.
Enkuantu, formasaun ba rádiu komunidade no mídia sei foka produsaun konten inkluziva ne’ebé promove, igualdade jéneru, justisa sosiál no partisipasaun sívika sei fasilita husi prezidente rádiu komunidade mak hanesan produsaun notísia ba rádiu, tékniku hakerek notísia, edita aúdiu, reportajen étika no seluk tan.
Iha fatin hanesan, Xefe Gabinete PAM Vikeke, Luís António Soares, husu jornalista no sosiedade sivíl sira aproveita aprende tanba ida-ne’e sai oportunidade ida hodi hasa’e koñesimentu.
“Ha’u husu ba mídia sira no sosiedade sira-ne’ebé hetan oportunidade partisipa formasaun ne’e tenke aproveita para hasa’e koñesimentu tanba servisu mídia nian ne’e importante tebes ba ita-nia Munisípiu Vikeke,” nia hato’o.
Entretantu, formasaun ne’e partisipa husi rádiu komunidade Vikeke, jornalista Agência TATOLI Munisípiu Vikeke no sosiedade sivíl sira ne’ebé eziste iha Munisípiu Vikeke hamutuk na’in-40. Formasaun ne’e durante loron rua.
Jornalista: Vitorino Lopes da Costa
Editór: Xisto Freitas da Piedade
