OEKUSI, 11 Juñu 2026 (TATOLI) – Asosiasaun Feto Mudansa Ekonomia Familia (AFMEF), hala’o formasaun kona-ba programa dezenvolvimentu oportunidade traballu no substánsia hodi habelar informasaun papél AFMEF nian ba jerasaun foun sira, liliu grupu LGBTI no feto rurál sira atu haforsa produsaun Tais nu’udar identidade kultura Oekusi nian.
Diretora AFMEF, Joana Bobo Tano, esplika, atividade formasaun ne’e ba grupu soru Tais sanolu, ne’ebé hetan apoia fundu husi Gabinete Apoia Sosiedade Sívil (GASC, sigla portugés), hodi kontinua promove talentu inisiativa, prodús Tais ho kualidade no jestaun ba orsamentu iha grupu.
“Tanba grupu sira-ne’e, atividade la hanesan maibé prioridade primeiru maka soru Tais, depois atividade seluk maka balun fa’an modo, no rai impresta osan, ne’e maka ohin fasilita formasaun ba sira grupu foun sanolu, ne’ebé identifikadu ona mai husi Ema ho Defisiénsia no LQBTI, tan ne’e agradese ba GASC, tanba bele aumenta tan sira-nia fundu ne’e nu’udar motivasaun atu kontinua sira-nia atividade,” nia hateten, iha salaun Dominikana Oekusi, ohin.
Notísia relevante:Autoridade RAEOA sei aloka fundu ba AFMEF dezenvolve produtu Tais Oekusi
Feto potensiál ne’e esplika katak AFMEF hanesan organizasaun feto ida iha Oekusi, harii ho konsiénsia ba nesesidade empoderamentu ekonomia família. Ne’ebé hahú estabelese iha 2021, ho nia atividade prinsipál sira maka, formasaun Tais kualidade ba soru-na’in sira envolve jerasaun foun, no promove identidade Tais Oekusi nu’udar kultura Atoni nian.
“AFMEF mós fasilita formasaun negósiu ba feto agrikultór sira hanesan rai no impresta osan, ne’ebé ami-nia programa sira, hanesan ohin formasaun ne’e mai husi grupu sanolu, envolve husi Ema ho Defisiénsia (EhD) no grupu LGBTI, tanba misaun asosiasaun AFMEF katak, tenke tau matan ba ema hotu, atu labele husik ema ida iha kotuk,” nia hateten.
Nia informa, pontu susesu husi asosiasaun AFMEF, akumula ona grupu hamutuk 97, mai husi suku 20 no sub-rejiaun haat, hetan apoia direita fundu mai husi Autoridade RAEOA, no iha 2024 hitu hitu (7) maka hetan apoia fundu mai husi Gabinete Apoia Sosiedade Sívil (GASC, sigla portugés) no iha 2026 ne’e grupu foun sanolu hetan tan apoia husi GASC.
“Ne’ebé, grupu 17 maka hetan apoia husi GASC, kada grupu mai husi suku idak-idak no restante hetan apoia mai husi Autoridade RAEOA, tanba AFMEF nia baze iha komunidade no besikliu ba feto rurál sira, EhD no LGBTI, iha komitmentu ba prevensaun kultura hanesan, Tais bidu tradisionál, ami-nia esforsu ba atividade sira-ne’ebé ami hala’o, alvu ba jerasaun foun nune’e soru-Tais bele kontinua ejizte iha ita-nia rai, nu’udar kultura no identidade rasik. Tanba ne’e liuhusi polítika AFMEF nian ami sei la’o atu promove kultura Tais Oekusi,” nia hateten.
Notísia relevante:Joven feto 20 iha Oekusi kompete soru-Tais atu prezerva identidade Atoni
Iha fatin hanesan, Adjunta GASC, Jacinta Lezia, informa, GASC konsege apoia ona grupu 17 mai husi suku iha Oekusi, tanba iha 2024 grupu hitu (7) maka hetan ona apoia no tinan ne’e aumenta tan grupu sanolu, no hela de’it suku tolu maka seidauk integra an ihafundu GASC ne’e.
“Formasaun ne’ebe oferese, kona-ba oinsá halo Tais ida ho kualidade, no mós formasaun kona-ba oinsá jestaun ba grupu atu jere osan ho di’ak, tanba grupu tenke iha jestaun di’ak ba atividade sira-ne’ebé ita hetan, bele fó duni benefísiu ba inan feto sira,” nia hateten.
Adjunta ne’e haktuir, iha tinan ida-ne’e, mai ho aproximasaun diferente ba alvu sira tenke inkluziva, alende feto maluk sira inklui joven feto sira no mós maluk Ema ho Defisiénsia no LGBT
Notísia relevante:Dezenvolve ekonomia família, AFMEF eleva abilidade grupu feto iha Oekusi
Jornalista: Abílio Elo Nini
Editór: Rafael Ximenes de A. Belo
