OEKUSI, 05 Juñu 2026 (TATOLI) – Prezidente Konsellu Administrasaun Fundu Espesiál Dezenvolvimentu (KAFED), Samuel Marçal, fó ona orientasaun ba Rejiaun Administrativa Espesiál Oekusi Ambeno (RAEOA), hodi atende nesesidade bolseiru na’in-11, ne’ebé daudaun ne’e hala’o hela estudu Institutu Pariwisata Trisakti Jakarta Indonésia antes ne’e selebra ona kontratu ho Autoridade RAEOA liuhusi Fundu Espesiál Dezenvolvimentu (FED) atu kontinua sira-nia estudu ho nível Lisensiatura (S1) no Mestradu (S2).
“Ne’e kapitál umanu husi FED RAEOA nian, tanba foin daudaun kria Sekretáriadu atu jere FED ne’e, sistema foin mak komesa la’o seidauk to’o fulan, foin maka asesu ba sistema, ne’ebé ha’u koordena ona ho Autoridade atu hahú ona halo prosesu pagamentu tranferénsia, tanba ne’e situasaun ida mak ita enfrenta, maibé ita esforsa atu rezolve situasaun ne’e, espera katak tinan oin mai buat hotu bele la’o di’ak ona,” nia hateten, hafoin enkontru ho Autoridade RAEOA iha Oekusi, ohin.
Governante ne’e, fó ezemplu bainhira hadi’a de’it ponte no estrada fasíl, maibé atu hadi’a instituisaun ida ho reforma sistema la’ós fasíl, no presiza tempu ho pasiénsia tanba liga ho mudansa estrutura tranzitória RAEOA ba estruturura definitiva, tan ne’e maka atraza uitoan ba prosesu pagamentu ba estudante sira.
Notísia relevante:‘Abandonadu’, estudante bolseiru na’in-11 iha Indonézia triste ho Autoridade RAEOA
Prezidente Autoridade RAEOA, Régio da Cruz Salu, rekoñese ezijiénsia estudante bolseiru na’in-11 iha Jakarta inklui balun iha rai laran, ho nia problema la’ós RAEOA maka abandona, maibé tanba mudansa estrutura RAEOA hodi pendente prosesu barak.
“Ha’u hakarak klarifika katak, Autoridade asina sira-nia proposta, ita-nia obrigasaun atu selu sira-nia transferénsia iha fulan-Marsu liuba, maibé momentu ne’e ha’u moras, Prezidente Interinu kontinua prosesu ne’e, maibé Diretora Finansa momentu ne’ebá seidauk tama serbisu tanba mudansa estrutura RAEOA, entaun ida-ne’e maka halo pendente ba prosesu, maibé aprovasaun ne’e iha Marsu liubá,” nia klarifika.
Autoridade ne’e informa, bainhira retoma hikas funsaun hanesan Prezidente Autoridade, prosesu ne’e tarde uitoan tanba Diresaun Rejionál Finansa foun ho sistema foun, no hetan espesimentu iha serbisu Sistema Government Resource Planning (JRP), ne’ebé iha loron 31 Marsu 2026 sesa hotu, tanba serbisu maioria iha administrasaun públika Oekusi funsionáriu kazuál.
“Ne’ebé, bainhira renova ona kontratu depois diretora Finansa foun foin simu pose iha loron 28 Abríl ne’e, entaun serbisu hahú inísiu Maiu, maibé ohin ha’u asina ona pedidu transferénsia osan ne’e, ne’ebé atu klarifika katak, la’ós RAEOA abandona estudante sira maibé tanba mudansa estrutura maka akontese iha Oekusi,” nia hateten.
Notísia relevante:Última hora: Ministru Tomas Cabral pose PA RAEOA ho estrutura na’in-24 iha Oekusi
Rekorde fali katak antes ne’e, iha loron 26 Maiu 2026, estudante bolseiru na’in-11, ne’ebé antes ne’e Autoridade Rejiaun Administrativa Espesiál Oekusi Ambeno (RAEOA), haruka hodi kontinua sira-nia estudu iha Institutu Pariwisata Trisakti Jakarta Indonésia, triste no preokupa tanba Autoridade RAEOA sente abandonadu no la halo pagamentu propina ba segundu périodu inklui alozamentu durante fulan rua ona, husi Abríl to’o Maiu 2026 ne’e
Nune’e estudante sira naʼin-11, husu atu sériu trata pagamentu propina ho alojamentu ho preokupasaun sira mak hanesan tuir mai ne’e:
- Pagamentu ba propinas segundu períodu, Mestrado (S2) na’in-lima (5) ho totál pagamentu mak Rp112.500.000 (Seratus dua belas juta Rupiah), Lisensiatura (S1) na’in-neen (6) ho totál pagamentu mak Rp73.000.000,
- Pagamentu ba alojamentu ou subsidíu durante segundu períodu, S2 ema na’in-lima (5) ho totál pagamentu mak $15.500, S1 ema na’in-neen (6) ho totál pagamentu mak $18.600.
Jornalista: Abílio Elo Nini
Editór: Rafael Ximenes de A. Belo
