OEKUSI, 26 Novembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, kuarta ohin, abertura kompetisaun soru-Tais ba joven feto hamutuk na’in-20 iha salaun Diresaun Komérsiu no Indústria, hodi komemora loron proklamasaun independénsia 28 Novembru ba dala-50.
Notísia relevante:Autoridade RAEOA sei aloka fundu ba AFMEF dezenvolve produtu Tais Oekusi
Durante sesaun abertura, Régio Salu, konsidera kompetisaun ne’e importante ba foinsa’e sira, atu kontinua promove no prezerva Tais Oekusi nian nu’udar identidade kultura povu Atoni nian, ne’ebé bei-ala sira husik hela.
“Kompetisaun soru-Tais ne’e, ita apoia planu negósiu ekosistema investimentu iha Tais, husi produksi sampai ke pasar (husi produsaun ba merkadu), kualidade Tais ida-ne’ebé di’ak ba merkadu, aleinde asuntu prezervasaun no konservasaun valór sivilizasaun. Ita nu’udar jerasaun kontinuadór tenke habelár nafatin liman-badaen avo sira uluk, husik hela to’o ohin, ita hamoris nu’udar identidade kultura Oekusi nian,” nia hateten iha salaun Diresaun Komérsiu Oekusi, ohin.
Vise-Prezidente Komisaun Organizadora ba Feira Produtu Lokál iha Oekusi, Imaculada da Cruz, informa, kompetitór na’in-20 ne’e, reprezenta suku 20 iha Oekusi, na’in-10 ho idade 15 mai kraik no na’in-10 idade 20 to’o 25.
“Objetivu husi kompetisaun ne’e atu motiva no promove joven atu kompete iha soru-Tais, tanba atividade ne’e hanesan identidade kultura Oekusi nian, dezde bei-ala sira to’o ohin loron, entaun ita nu’udar jerasaun foun, obrigatóriu atu hatene no kontinua prezerva, tan ne’e iha komemorasaun loron proklamasaun ne’e, komisaun hili atividade ne’e integra ba ajenda kompetisaun hodi kontinua promove atu labele haluha ita-nia identidade kultura ne’e,” nia hateten.
Notísia relevante:Prezidente Repúblika apoia inisiativa estabelese muzeu tais iha Oé-Cusse
Entretantu, molok kompetisaun hahú, Joana Bobo Tano, nu’udar Prezidente Juri esplika, kritéria no regra sira atu manan iha kompetisaun ne’e, tenke kumpre oras ne’ebé determinadu ona, haree ba kualidade Tais, oras hahú to’o ramata, tanba iha kompetisaun konkorrente sira produs Tais modelu bandeira RDTL nian kompleta mós ho nia fitun iha kór metan nia klaran, no mós iha Tais ne’e mós hakerek letra ho lian baikeno ‘Nekaf-Mese Ansao-Mese’, signifika, neon ida laran ida.
“Durante kompetisaun proibidu halo deskusaun tanba kompetisaun ne’e la’o tuir regra, atu identifika konkorente ne’ebé mak laís liu ho kualidade, tanba kompetisaun ne’e realiza loron tomak ida, hahú dadersan tuku 08:00 meiudia remata iha tuku 16:00 lorokraik, depois kontinua kedas anúnsia rezultadu,” nia afirma.
Hafoin kompetisaun, Francisca Antónia Oqui, husi suku Bobokase sub-rejiaun Pante Makasar, nu’udar kompetitora, orgullu tanba foin primeira-vés bele partisipa, nune’e bele promove soru-Tais nu’udar identidade Oekusi nian.
“Ha’u sente kontente ba Governu tanba bele loke kompetisaun ne’e ba ami hanesan joven feto, atu promove ami-nia talentu nu’udar suru na’in-ida, tanba atividade ami kontinua avo sira-nia liman fatin, maske la hetan vensedór iha kompetisaun ne’e maibé orgullu ha’u bele aprezenta iha públiku, atu koñese lala’ok kompetisaun soru-Tais ne’e, tanba ha’u rasik foin primeira-véz partisipa iha kompetisaun ne’e,” nia orgullu.
Notísia relevante:Autoridade oferese materiál ba grupu feto Oé-Cusse mellora kualidade soru tais
Joven feto na’in-20 ne’e, nu’udar reprezentante mai husi suku 20 iha Oekusi, ne’ebé hetan akompañamentu direita husi parsériu Timor Aid, Prezidente Feto Potensiál Oekusi inklui Autoridade RAEOA.
Jornalista: Abílio Elo Nini
Editór: Rafael Ximenes de A. Belo
