iklan

EKONOMIA, HEADLINE, INKLUZAUN SOSIÁL, MUNISÍPIU, OÉ-CUSSE (RAEOA)

Autoridade oferese materiál ba grupu feto Oé-Cusse mellora kualidade soru tais

Autoridade oferese materiál ba grupu feto Oé-Cusse mellora kualidade soru tais

Autoridade oferese materiál ba grupu feto Oé-Cusse hodi mellora soru tais. Imajen mídia ZEESM.

OÉ-CUSSE, 20 setembru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi Unidade Turizmu Komunitária, tersa ne’e oferese materiál ba grupu feto sira-ne’ebé hala’o atividade soru tais hodi mellora kualidade produtu tais iha rejiaun ne’e.

Autoridade apoia materiál ba grupu soru tais sira maka hanesan kabas ho kór oinoin, ai-soru, ai- diur, no ai-hun kabas, ho montante gastu ba apoiu hirak ne’e hamutuk rihun $2.098.00, ne’ebé Autoridade RAEOA aloka hosi Orsamentu Jerál Estadu (OJE) 2022.

Nune’e grupu feto sira-ne’ebé hetan apoia hamutuk grupu neen (6) durante ne’e sira hamahan-aan iha grupu rede soru tais, maka hanesan iha sub-rejiaun Oésilo grupu rua, ida hosi aldeia Oebaha, suku Bobometo no ida hosi suku Usitasa’e.

Iha sub-rejiaun Pante Makasar, hosi grupu Boksufa hosi suku Taiboko, grupu Oétulu hosi suku Costa, grupu Moris Foun hosi suku Naimeko, grupu Bertais hosi suko Bobokase.

Prezidente Autoridade RAEOA, Arsénio Paixão Bano, informa, apoia ne’e mai hosi Unidade Turizmu Komunitaria ne’ebé tutela iha Gabinete Prezidente Autoridade, ho objetivu hodi mellora kualidade soru tais no hasa’e kresimentu ekonómia ba grupu sira iha Oé-Cusse.

“Ha’u orgaullu tanba Autoridade sempre apoiu grupu sira-nia ezisténsia hodi mellora di’ak liután kualidade tais iha futuru, tanba polítika Autoridade hasai sirkulár ida funsionáriu hotu atu uza selendan loron-loron iha signifikadu tanba liuhosi tais maka ohin loron, ita-bele sai boot, inklui ha’u rasik bele sai hanesan Prezidente Autoridade, tanba ne’e uza salendan fiar-aan tanba promove grupu sira hodi hasa’e kresimentu ekonomia família nian,” Arsénio Bano ko’alia iha jardín Koreanu, Oébau, Oé-Cusse.

Ezekutivu ne’e, orgullu tanba grupu rede soru tais hakarak kontinua promove grupu sira iha fatin hotu-hotu la’ós ida ne’e de’it maibé promove mós labarik minoridade sira bele aprende ona suru tais no salenda.

Nune’e nia promete, iha futuru sei sei dezloka grupu rede soru tais hodi halo estudu komparativu iha nasaun viziñu hanesan iha Timur Tenggah Utara (TTU) Kefamananu, no kapubaten Belu hodi halo inavativu ba pasta, jaz, gravata no seluk tan.

Xefe grupu Boksufa hosi suku Taiboko, Berta Anin, agradese tanba Autoridade RAEOA iha inisiátiva di’ak hodi tulun grupu sira, nune’e bele fasilita di’ak liután no hasa’e atividade soru tais iha kada grupu ida-idak.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!