EKONOMIA, HEADLINE, MUNISÍPIU, OÉ-CUSSE (RAEOA)

Prezidente Repúblika apoia inisiativa estabelese muzeu tais iha Oé-Cusse

Prezidente Repúblika apoia inisiativa estabelese muzeu tais iha Oé-Cusse

Prezidente Repúblika, Jose Ramos-Horta. Imajen Tatoli/Egas Cristóvão

OÉ-CUSSE, 04 juñu 2024 (TATOLI) – Prezidente Repúblika, José Manuel Ramos Horta,  fó apoia másima ba inisativa selebra akordu MoU entre Autoridade Rejiaun Administrativa Espesiál Oé-Cusse Ambeno (RAEOA) ho Timor Aid atu estabelese muzeu hodi prezerva tais Timor nu’udar patrimóniu kulturál.

“Ha’u partisipa nu’udar testemuña ba akordu ne’e, insiativa ne’e importante di’ak tebes, ha’u nu’udar Prezidente klaru fó tan ne’e apoia maka’as, tanba tais ne’e ita-nia produtu no propriedade intelektuál ida, mai husi povu, istória no mai husi tradisaun no mai husi bei-ala sira, ne’ebé hetan rekoñesimentu mundiál liuhusi UNESCO, tanba tais ne’e produtu naturál ida no tradisionál,” Prezidente Repúblika, ko’alia iha otel Ambeno.

Notísia relevante: Governu sei fó sansaun ba xineza ne’ebé imita dezeñu tais Timor

Tuir Xefe Estadu katak, bainhira tais Timor hetan ona rekoñesimentu husi UNESCO, la’ós buat bainbain nian, maibé liuhusi prosesu luta maka’as, halo investigasaun no sira rekoñese duni, bele sai atrasaun boot kulturál iha mundu.

“Ezemplu agora daudaun emprezáriu timoroan balun, komesa halo dezeñu roupa Timor ho marka batik tais, entaun ne’e sei sai produtu boot ida, ne’e duni ha’u fó parabéns ba ekipa Timor Aid ho Autoridade RAEOA, iha tempu badak halo ona inovasaun barak, Oé-Cusse sei kontente ho nia lideransa ida-ne’e, sei buka halibur ema hotu, dinamiza ekonomia tanba investidór barak mak sei mai Oé-Cusse,” nia orgullu.

Prezidente Autoridade RAEOA, Rogério Tiago Lobato, fó sai, fatin ne’ebé Autoridade oferese ba Timor Aid, identifika ona iha suku Suni-Ufe, sub-rejiaun Nítibe ho medida rai ektare hitu (7).

“MoU ne’e atu halo kooperasaun di’ak ho Timor Aid, nia mai ho nia koñesimentu barak ho nia kontaktu iha mundu hanesan UNESCO, ne’ebé rekoñese ona ita-nia tais ne’e, hanesan patrimóniu komunidade, entaun ha’u hanesan Prezidente RAEOA, ha’u romete atu fó fatin ba sira, rai tanba ita halo la’ós muzeu de’it, iha muzeu laran ema sei ba soru-tais atu turista sira iha mundu tomak bele haree, maibé ida besik muzeu mós tenke iha fatin ida atubele kuda kabaas, ne’ebé ita hili rai ida iha Oénunu besik ektare hitu (7),” nia hateten.

Eis Ministru Interiór ne’e, espera ba futuru harii muzeu ne’e sei fó benefísiu ba ekonomia Timor-Leste no bele atrai turista hosi estranjeiru.

Diretora Ezekutiva Timor-Aid, Maria do Ceo Lopes, agaradese ba Autoridade RAEOA tanba ho disponivel fó fatin atu halo muzeu.

“Ami buka tinan barak nia laran, buka fatin, liuliu iha Díli la hetan, maibé RAEOA disponivel atu harii muzeu, entaun iha hetan fatin iha Oé-Cusse ita harii, ema sei mai, ha’u emosionadu tanba dalan ne’ebé ami liu to’o ohin loron, tanba rezultadu tais 400 maioria tradsionál husi Timor-Leste tomak, ami iha estrutura atu soru 300-resin, ho materiál ekipamentu hodi soru-tais, Timor-Aid, tinan ba tinan fatin atu halo prezervasaun seidauk iha, maibé ho UNESCO nia rekoñesimentu hahu tradisaun tais aas tebes,” nia dehan.

Notísia relevante: Asosiasaun Rede Soru Na’in prezerva tais nu’udar patrimóniu TL nian

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!