DILI, 11 Juñu 2026 (TATOLI)–Ministériu Edukasaun (ME) no Ministériu Saúde (MS) realiza sorumutu no formasaun kona-ba Saúde Eskolár ba diretór eskola públiku no privadu iha Munisípiu Dili atu reforsa promosaun saúde no prevensaun moras iha ambiente eskolár.
Diretór-Jerál Ensinu Sekundáriu Jerál no Ensinu Tékniku-Vokasionál, Deolindo da Cruz, hateten atividade ne’e importante atu fó informasaun no orientasaun ba diretór eskola sira atu bele implementa programa saúde eskolár iha sira-nia instituisaun ida-idak.
Nia dehan atividade ne’e envolve eskola públiku no privadu hamutuk 23 iha Dili no fó oportunidade ba tékniku saúde sira atu fahe koñesimentu kona-ba prevensaun moras no promosaun saúde ba diretór eskola sira.
“Objetivu prinsipál hosi atividade ida-ne’e mak atu fó koñesimentu ba diretór eskola sira kona-ba dalan moris saudável. Depois formasaun ne’e, diretór sira sei fila ba sira-nia eskola ida-idak atu halo koordenasaun ho Ministériu Saúde hodi implementa Programa Saúde Eskolár,” Deolindo da Cruz informa ba jornalista sira, iha salaun INFORDEPE, Balide, Kinta ne’e.
Nia akresenta tan, saúde sai fatór importante ba prosesu aprendizajen tanba estudante ne’ebé iha kondisaun saúde di’ak mak bele aprende ho efetivu no atinje sira-nia objetivu edukasionál. Atividade ne’e aborda mós asuntu sira kona-ba hahán saudável, bee moos, prevensaun.
Iha sorin seluk, Diretór Nasionál Edukasaun no Promosaun Saúde, Jaime dos Reis Belo, hateten katak Programa Saúde Eskolár implementa ona durante tinan hirak liubá liuhosi kolaborasaun entre Ministériu Saúde no Ministériu Edukasaun.
“Programa Saúde Eskolár mak atu fó informasaun saúde ba estudante sira atu sira bele komprende di’ak kona-ba prevensaun moras no pratika moris saudável,” dehan Jaime.
Nia akresenta tan katak programa ne’e mos fó edukasaun kona-ba prevensaun moras króniku hanesan hipertensaun no diabetes, no moras transmisível hanesan tuberkulose (TB) no HIV/AIDS.
Jaime hateten katak atualmente ekipa saúde eskolár kontinua hala’o atividade promosaun saúde iha munisípiu Ainaru, Bobonaru, Same no Ermera.
Kolaborasaun entre Ministériu Saúde no Ministériu Edukasaun bele kontinua fortalese Programa Saúde Eskolár no aumenta koñesimentu estudante sira kona-ba prevensaun moras no pratika moris saudável.
Jornalista: Osória Marques
Editór: Xisto Freitas da Piedade
