DILI, 03 Juñu 2026 (TATOLI)—Tuir projetu neʼebé aprezenta husi Vise-Ministru Komérsiu, Augusto Júnior Trindade, Konsellu Ministru delibera aseita hala’o Reuniaun Komité Koordenasaun ASEAN ba Servisus (CCS) nian ba da-115 iha Timor-Leste.
Reuniaun ne’e sei prevee ona ba trimestre dahuluk tinan 2027, tuir saida mak propoin husi Sekretariadu ASEAN, nu’udar mós parte ida husi membru nia obrigasaun no mós preparasaun ba Prezidénsia ASEAN iha tinan 2029.
Komité Koordenasaun ASEAN ba Servisus nu’udar orgaun prinsipál ASEAN nian ne’ebé responsavel ba koordenasaun polítika integrasaun no liberalizasaun komérsiu servisus nian, ne’ebé serbisu hodi promove redusaun barreira komérsiu, abertura merkadu servisu no mobilidade profisionál kualifikadu sira entre Estadus-Membrus ASEAN nian.
Bainhira enkontru ne’e hala’o iha Timor-Leste nu’udar oportunidade neʼebé estratéjikamente importante ba kontinuasaun integrasaun Timor-Leste iha ASEAN no ba hametin partisipasaun ativa nasaun nian iha mekanizmu setoriál sira ASEAN nian,
Aleinde ne’e mós permite ministériu no ajénsia relevante sira atu hetan esperiénsia prátika iha jestaun reuniaun ASEAN, protokolu diplomátiku, koordenasaun lojístika no envolvimentu parte interesada sira.
Jornalista : Alexandra da Costa
Editór : Cancio Ximenes
