VIKEKE, 11 Juñu 2026 (TATOLI)—Komandante Protesaun Sivíl Munisípiu Vikeke (APC-sigla portugeza), Cirílio Soares, hateten situasaun atuál iha foho Builó, Munisípiu Vikeke, normál hikas.
“APC agora kontinua matein iha-ne’ebá monitoriza situasaun sira,” Cirílio hateten ba jornalista sira iha Vikeke, Kinta ne’e.
Tuir dadus, komunidade afetada foho Builó hamutuk uma-kain 17. Husi númeru ne’e komunidade Suku Builó uma-kain neen (6) no komunidade husi Suku Ossorua uma-kain (11) ho totál abitante ne’ebé evakua hamutuk na’in-80. Husi dadus ne’e, ema ho defisiénseia na’in-ida (1), idozu na’in-sia (9), labarik ki’ik na’in-ualu (8) no moras ida.
Notísia relevante: APC apoia nesesidade bázika ba komunidade efetada foho Builó
Iha biban ne’e, Cirílio, haktuir APC sei koordena ho peritu sira hodi bá halo teste ba rai monu iha foho Builó.
“Kona-ba rai monu ne’e, daudaun ne’e ami halo koordenasaun hela ho parte relevante sira, maibé bainhira mak bá halo teste karik ami seidauk hatene lolos. Ami husu komunidade labele fila-hikas lai ba hela fatin atu evita risku,” nia subliña.
Iha parte seluk, autoridade lokál husi Postu Administrativu Ossú husu jeolosista sira halo teste ba foho Builó hodi identifika kauza husi foho monu molok komunidade sira fila bá sira-nia hela fatin.
Xefe Suku Ossorua, Eduado da Silva Freitas, hateten komunidade afetada evakua ona bá fatin sira seguru, nune’e parte jeolosista sira presiza lori ekipamentu ruma mai hodi halo teste ba foho Builó tanba kalan-kalan iha foho ne’e sempre tarutu hela de’it.
“Ita presiza halo teste atu ita bele hatene keta vulkániku karik. Ita ta’uk mak komunidade bá fali ne’ebá hetan dezastre tan,” Eduardo tenik.
Jornalista: Vitorino Lopes da Costa
Editór: Xisto Freitas da Piedade
