VIKEKE, 09 Juñu 2026 (TATOLI)—Autoridade Protesaun Sivíl (APC-sigla portugeza) Munisípiu Vikeke, Tersa ne’e, distribui nesesidade bázika ba komunidade uma-kain 17 ne’ebé afetadu husi foho Builó.
Iha distribui nesesidade bázika ne’e, Komandante Protesaun Sívil Munisípiu Vikeke, Cirílio Soares Gomes, haktuir akontesimentu foho Builó dolus-tun iha loron 07 Juñu foin lalais ne’e APC hamutuk ho Autoridade Munisípiu Vikeke dezloka kedas bá fatin akontesimentu hodi haree direta situasaun foho nian no komunidade sira-nia kondisaun.
Notísia relevante: Autoridade Vikeke dezloka ona komunidade afetada foho Builó bá fatin seguru
Nia akresenta, distribuisaun apoia nesesidade bázika ba komunidade hodi aguenta situasaun emerjénsia ne’ebé komunidade enfrenta.
Pokete emerjénsia ne’ebé APC apoia kompostu husi foos, mina, susu-been, masin-midar, sardina, supermie, xá, kafé no balde. Nune’e mós Cruz Vermeira Timor-Leste (CVTL) apoia lona ba kada uma-kain.
Iha fatin hanesan, Xefe Suku Ossorua, Eduado da Silva Freitas, hato’o agradesimentu ba Governu tanba apoia ona ai-han báziku ba komunidade afetada.
“Ami autoridade hakarak hato’o agradesimentu ba Governu ne’ebé tau-atensaun tebes ba nia povu ne’ebé enfrenta dezastre naturál. Maski ai-han uitoan ka barak ami hato’o agradesimentu tanba bele ajuda ona ami-nia komunidade,” nia hato’o.
Iha biban hanesan, reprezentante komunidade afetada, Horácio da Silva, sente kontente ba apoia sira-ne’ebé parte Governu oferese ona ba komunidade hodi aguenta moris.
Tuir dadus, komunidade afetada foho Builó hamutuk uma-kain 17. Husi númeru ne’e, komunidade Suku Builó uma-kain neen (6) no komunidade husi Suku Ossorua uma-kain 11 ho totál komunidade ne’ebé evakua hamutuk na’in-80. Husi dadus ne’e, ema ho difisiénsia na’in-ida (1), idozu na’in-sia (9), labarik ki’ik na’in-ualu (8) no moras ida.
Entretantu, distribuisaun nesesidade bázika ne’e partisipa husi autoridade lokál, Polísia Postu Ossú, reprezentante Autoridade Munisípiu Vikeke, CVTL no komunidade afetada husi Suku Builó no Suku Ossorua.
Jornalista: Vitorino Lopes da Costa
Editór: Xisto Freitas da Piedade
