KOVALIMA, 10 Juñu 2026 (TATOLI)-Família uma-ka’in 60-resin iha aldeia Halik, suku Beko, postu administrativu Suai, Kovalima to’o oras ne’e seidauk asesu liña eletrisidade.
Komunidade aldeia Halik,Domingos Pires, hato’o preokupasaun ne’e tanba iha tinan 2025 liubá empreza balun rai ona airin eletrisidade iha fatin ne’ebá maibé to’o oras ne’e seidauk halo prosesu instalasaun nune’e komunidade sira kontinua moris iha nakukun iha tempu kalan.
“Suku Beko iha aldeia 11úniku aldeia Halik mak nia ahi seidauk lakan tanba sa ida ami la hatene, maske empreza hari’i ona riin eletrisidade,” nia hato’o lamentasaun ne’e ba jornalista sira iha suku Beko.
Tanba ne’e, nia husu ba Governu liuhosi servisu munisipál atu husu ba kompaña ne’ebé antes ne’e hari’i ona ai-rin eletrisidade atu aselera prosesu instalasaun bai ha komunidade sira-nia uma.
Xefe Suku Beco Arlindo Vernardino Lemos, reforsa komunidade iha aldeia Halik seidauk asesu eletrisidade maske komunidade aldeia 10 seluk huhsi suku Beko nian durante ne’e asesu ona eletrisidade.
“Aldeia Halik mak seidauk asesu eletrsidade hahú iha tempu okupasaun Portugués to’o ohin nune’e sira kontinua sei moris iha nakukun laran,”nia hateten.
Lideransa komunitária ne’e esplika, iha 2025 suku Beko iha ona instalsaun liña eletrisidade husi aldeia Maucola bá to’o Tobur, husi Holbolu bá Dilu-hilin asesu ona eletrisidade, no falta de’it husi suku sentru kuaze kilómetru tolu bá iha aldeia Halik mak seidauk asesu eletrisidade to’o ohin loron.
“Ami husu ba EDTL,atu aselera prosesu nune’e komunidade bele asesu ona eletrisidade tanba durante ne’e ami mós rezolve ona problema balun husi suku ba iha EDTL, maibé to’o ohin loron seidauk iha rezultadu nune’e komunidade sei moris iha nakukun laran,” nia hateten.
Tuir dadus kompaña Laliba iha tinan 2025 harii ona airin eletrisidade iha aldeia ne’e ho durasaun tempu hahú husi fulan-Janeiru to’o Dezembru 2025 maibé to’o ona fulan-Juñu 2026 seidauk finaliza tuir tempu ne’ebé maka iha.
Jornalista:Celestina Teles
Editór:Florencio Miranda Ximenes
